झण्डै ७ लाखको फुड स्ट्याम्प खोस्ने ट्रम्प प्रशासनको योजना अदालतबाट खारेज
प्रकाशित मिति : कार्तिक ३, २०७७ सोमबार
झण्डै ७ लाखको फुड स्ट्याम्प खोस्ने ट्रम्प प्रशासनको योजना अदालतले खारेज गरिदिएको छ । वासिंटन डिसीका न्यायाधिस बेरिल हवेलले ६७ पृष्ठ लामो निर्णय सार्वजनिक गर्दै ट्रम्पको नियम कार्यान्वयनमा रोक लगाएको हो ।
ट्रम्प प्रशासनले वेरोजगारहरुलाई खाद्य सुविधाका लागि दिने फुड स्ट्याम्प कार्यक्रममा नयाँ नियम ल्याउन लागेकोमा न्युयोर्क र वासिंटन डिसीसहित १३ राज्यले त्यसका बिरुद्ध मुद्दा दायर गरेका थिए । अमेरिकी सरकारको कृषि मन्त्रालयले फुड स्ट्याम्पका लागि योग्य हुनका लागि नयाँ मापदण्ड तय गरेको मा त्यसका बिरुद्ध मुद्दा दायर गरिएको थियो ।
नयाँ नियम कार्यान्वयन भएको भए १८ देखि ४९ बर्षबीचका व्यक्तिहरु प्रभावित हुने थिए । उनीहरु फुडस्ट्याम्पका लागि योग्य हुन विगत ३६ महिनाको अवधिमा तीन महिनाभन्दा बढी समय हप्तामा २० घण्टाभन्दा बढी काम गरेको हुनुपर्ने नयाँ नियममा उल्लेख थियो ।
अमेरिकी सरकारको कृषि मन्त्रालयले नयाँ नियम लागु भएपछि झण्डै ६ लाख ८० हजारको फुड स्ट्याम्प सुविधा खारेज हुने जनाएको थियो । यद्यपी नयाँ नियमबाट झण्डै साढे ७ लाख प्रभावित हुने अनुमान गरिएको थियो ।
नयाँ नियमले अमेरिकी सरकारको बार्षिक साढे ५ बिलियन डलर बचत हुने अनुमान गरिएको थियो । नियम कार्यान्वयन भएमा न्युयोर्कमामात्र ८४ हजारले यो सुविधा गुमाउने अनुमान गरिएको छ ।
नयाँ नियम कार्यान्वयन भएमा क्यालिफोर्नियामा झण्डै ३ लाखले, इलिनोयमा झण्डै १ लाख ७८ हजारले, टेनेसीमा ६९ हजारले, मिसिगनमा ७ हजारले सुविधा गुमाउने अनुमान गरिएको छ । अमेरिकामा कैयनले कामै नगरी सरकारी खाद्य सुविधा लिने वा कतिपयले नगदमा काम गरेर वेरोजगार रहेको देखाउदै यो सुविधा लिने क्रम बढेपछि सरकारले नयाँ नियम ल्याएको थियो ।
अमेरिकामा कैयन नेपालीहरुले यो सुविधा लिदै आएका छन् । फुड स्ट्याम्प लिनेमा अमेरिकामा नेपालबाट ल्याइएका भुटानी शरणार्थीहरुको संख्या पनि उल्लेख्य रहेको छ ।