जनगणनामा न्युयोर्कमा ९९ दशमलव ९ प्रतिशतको गणना, डेडलाइन भोलि विहानसम्म
प्रकाशित मिति : आश्विन २९, २०७७ बिहीबार
जनगणनामा न्युयोर्क राज्यमा ९९ दशमलव ९ प्रतिशतको गणना भइसकेको अमेरिकाको जनगणना ब्यूरोले अनुमान गरेको छ । अक्टोबर १६ को विहान ६ बजे जनगणना औपचारिक रुपमा समाप्त हुनेछ । अर्थात् त्यसपछि जनगणनामा सहभागी हुन पाइने छैन ।
न्युयोर्कमा ६४ प्रतिशतले आफै अनलाइन, फोन वा पत्रमार्फत जनगणनामा सहभागी भएको जनाइएको छ । आफै जनगणनामा सहभागी नभएकाहरुलाई गणना गर्नका लागि कैयन गणकहरु खटाइएको थियो ।
अधिकांश राज्यमा ९९ दशमलव ९ प्रतिशतको गणना भइसकेको सेन्सस ब्यूरोले जनाएको छ । लुजियानामा ९८ दशमलव ५ प्रतिशत र मिसिसिपीमा ९९ दशमलव ७ प्रतिशतको गणना भएको जनाइएको छ ।
यसपटक अमेरिकामा नेपालीभाषीहरुलाई जनगणनामा सहभागी गराउनका लागि केन्द्रीय जनगणना ब्यूरोले विभिन्न खाले अभियानहरु संचालन गरेको थियो । नेपाली भाषामा नै विज्ञापनहरु प्रकाशित गर्नुका साथै नेपाली भाषामा वेवसाइट समेत बनाइएको थियो ।
न्युयोर्क सिटीले पनि नेपाली भाषामा सामाजिक सञ्जालहरु, अनलाइन लगायतका संचारमाध्यमहरु र सार्वजनिक स्थानमा राखिएका बोर्डहरुमा जनगणनाका विज्ञापनहरु राखेको थियो । विगतको जनगणनाको तुलनामा यसपटक नेपाली भाषीलाई पनि प्राथमिकता दिइएको हो ।
अमेरिकामा झण्डै ३ लाख नेपालीहरु रहेको अनुमान गरिएको छ भने नेपाली भाषीको संख्या झण्डै ५ लाख अनुमान गरिएको छ । जसमा भारतको केही भूभागका नेपालीभाषी, बर्माका नेपाली भाषी र भुटानका नेपालीभाषीहरु समेत पर्छन् । अमेरिकामा झण्डै १ लाख ग्रिनकार्डवाहक नेपाली र झण्डै ५० हजार नेपाली अमेरिकनहरु रहेका छन् ।
जनगणनामा कुनै पनि इमिग्रेशन स्टाटस भएका, कुनै पनि भिसामा भएकाहरु सहभागी हुन योग्य हुन्छन् । अमेरिकामा हुने विद्यार्थीहरुदेखि जोसुकै पनि जनगणनामा सहभागी हुन्छन् । उनीहरुको कुनै पनि विवरण अरु एजेन्सीहरुलाई प्रदान गरिदैन ।