ट्रम्पको कोरोना परीक्षणको नतिजा नेगेटिभ
प्रकाशित मिति : आश्विन २६, २०७७ सोमबार
अमेरिकी राष्ट्रपति डोनाल्ड ट्रम्पको कोरोना परीक्षणको नतिजा लगातार नेगेटिभ आएको छ । ह्वाइट हाउसका चिकित्सक सिन कोन्लेले सोमबार छोटो जानकारी सार्वजनिक गर्दै ट्रम्पमा कोरोना नेगेटिभ देखिएको जानकारी दिएका हुन् ।
ट्रम्पले फ्लोरिडामा चुनावी कार्यक्रम आयोजना गर्ने तय भएको केही घण्टा अगाडि यो रिपोर्ट सार्वजनिक गरिएको हो । एबोट ल्याबमा गरिएको एन्टीजेन परीक्षणका क्रममा ट्रम्पको रिपोर्ट नेगेटिभ देखिएको हो ।
राष्ट्रपति ट्रम्पका विभिन्न परीक्षणबाट अब ट्रम्पभित्र कोरोना भाइरस नरहेका पुष्टी भएको ह्वाइट हाउसले जनाएको छ । ट्रम्पलाई गत अक्टोबर २ मा कोरोना संक्रमण पुष्टी भएको थियो । त्यसपछि उनी तीनरात अस्पतालमा बसेका थिए ।
अमेरिकी राष्ट्रपतिको चुनाव आउन केही साता बाँकी रहँदा ७४ बर्षका ट्रम्पलाई कोरोना सक्रमण भएपछि रिपब्लिकन अभियानमा असर गरेको थियो । अब राष्ट्रपति ट्रम्प चुनावी अभियानमा फर्कन निकै उत्सुक देखिएका छन् ।
पछिल्ला पोलहरुमा ट्रम्पलाई अर्का उम्मेदबार बाइडेनले उल्लेख्य नम्बरले उछिनिरहेका छन् । ब्याटलग्राउण्ड राज्यहरुमध्ये जर्जियामामात्र ट्रम्प अगाडि देखिएका छन् । बाइडेनलाई पनि सोमबार गरिएको परीक्षणमा कोरोना नेगेटिभ देखिएको छ ।