चाइनिज ठानेर न्युयोर्कमा जापानी कलाकारमाथि कुटपिट, ९० हजार सहयोग संकलन
प्रकाशित मिति : आश्विन २२, २०७७ बिहीबार
न्युयोर्कसिटीमा बस्दै आएका एकजना जापानी कलाकारमाथि कुटपिट भएको छ । एउटा समुहले उनीमाथि चाइनिज ठानेर आक्रमण गरेको जनाइएको छ ।
आक्रमणबाट ती कलाकार घाइते भएका थिए । घटना न्युयोर्कको सबवे स्टेशनमा भएको हो । ४० बर्षका टाडाटाका उनोमाथि टिनएजरहरुको एउटा समुहले आक्रमण गरेको हो ।
जब उनी स्टेशनबाट भाग्न सफल भए त्यसपछि उनलाई लखेटीलखेटी कुटिएको थियो । ८ जना केटाहरु र केटीको समुहले उनीमाथि आक्रमण गरेको जनाइएको छ । उनीहरुले चाइनिज भन्दै गाली गरेर आक्रमण गरेका थिए ।
टोकियोमा जन्मिएका ती कलाकारलाई अस्पतालको इमर्जेन्सीमा लगिएको थियो । उनको दायाँ हात र काँधमा केही हड्डीहरु टुटेका छन् । उनको टाउकोमा पनि चोट लागेको छ ।
आक्रमण के कारणले गरिएको थियो भन्नेबारे केही स्पष्ट छैन । तर उक्त समुहलाई छोएको आरोपमा कुटपिट भएको जनाइएको छ ।
ती कलाकारका लागि गोफण्डमीमा सहयोगका लागि एकाउन्टसमेत खोलिएको छ । जसमा ९० हजार डलर जम्मा भइसकेको छ ।
