अमेरिकाको मिशिगनमा गभर्नरकै अपहरण योजना, १३ जनाबिरुद्ध अभियोग
प्रकाशित मिति : आश्विन २२, २०७७ बिहीबार
अमेरिकाको मिशिगनमा गभर्नर ग्रेचेन ह्वीट्मरलाई अपहरणको योजना बनाउने १३ जनाबिरुद्ध अभियोग लगाइएको छ । अपहरणको योजना बनाउनेहरुबिरुद्ध घरेलु आतंकवादको षड्यन्त्रको अभियोग लगाइएको छ ।
१३ मध्ये ६ जनाबिरुद्ध अपहरणको षड्यन्त्र गरेको अभियोग लगाइएको छ भने ७ जनाबिरुद्ध मिलिसिया समुहमा आवद्ध भएको अभियोग लगाइएको छ । उनीहरु सबैजनालाई हिराशतमा लिइएको छ भने उनीहरुले सरकारी भवनमा आक्रमण गर्ने र गभर्नरको अपहरण गर्ने योजना बनाएको जनाइएको छ ।
गभर्नर ह्वीटमरले आफ्नो काम अप्ठ्यारो भएको तर आफूलाई अपहरणको निशाना बनाइएला भनेर कहिले पनि अनुमान नगरेको बताइन् । राष्ट्रपति डोनाल्ड ट्रम्पले श्वेत सर्वोच्चतावादीहरुको निन्दा नगरेका कारण यो अवस्था आएको उनले आरोप लगाइन् । ट्रम्पले गतसाता मिशिगनका यी मिलिसिया समुह जस्ता श्वेत सर्वोच्चतावादीहरुकोे निन्दा गर्न अस्वीकार गरेका थिए ।
अपहरणको योजना बनाएका कारण पक्राउ परेकाहरुमा अधिकांश मिशिगन निवासी हुन् भने २१ देखि ४२ बर्षसम्मका व्यक्ति रहेका छन् । उनीहरुबिरुद्ध हातहतियार र आतंक सम्बन्धि अन्य कैयन अभियोगहरु समेत लगाइएको छ ।
एफबीआईले यसबारे सन् २०२० को सुरुदेखि नै अनुसन्धान सुरु गरेको थियो । एफबीआईएले त्यसका लागि एकजना गोप्य जासुसको नियुक्त गरेका थिए । त्यसपछि उनीहरुको आक्रमण र अपहरणको योजनाबारे पत्ता लगाउन एफबीआई सफल भएको थियो । उनीहरुले सरकारी भवन उडाउन र गभर्नरलाई अपहरण गर्न २ सय व्यक्ति आवश्यक रहेकोबारे छलफल गरेका थिए ।