न्युयोर्क सिटीका केही भाग भोलिदेखि शटडाउन
प्रकाशित मिति : आश्विन २१, २०७७ बुधबार
क्वीन्सबोरो ब्रिजबाट देखिएको क्वीन्सतर्फको दृश्य । फोटो : खसोखास
न्युयोर्क सिटीका केही भागहरुमा कोरोनाको संक्रमण बढेपछि भोलिदेखि शटडाउन गरिने भएको छ । अक्टोबर ८ देखि कम्तीमा १४ दिन शटडाउन गरिने जनाइएको छ । बु्रकलिनका केही क्षेत्र र क्वीन्सका फार रकवे र फ्लसिङका केही क्षेत्रहरु शटडाउन हुने भएका छन् ।
रातो, सुन्तला र पँहेलो क्षेत्र विभाजन गरेर शटडाउनको योजना अगाडि ल्याइएको छ । रातो क्षेत्रमा स्कुलहरु बन्द भइसकेका छन् । अत्यावश्यक बाहेकका विजनेशहरु भोलिदेखि बन्द हुनेछन् भने रेष्टुरेण्टहरुमा टेकआउटमात्र संचालन हुनेछ । भेलाहरुमा प्रतिबन्ध लगाइएको भने पूजास्थलहरुमा क्षमताको २५ प्रतिशत वा अधिकतम १० जनासम्ममात्र भेला हुन पाइनेछ ।
त्यस्तै सुन्तला क्षेत्रमा विद्यालयहरु भोलिदेखि बन्द हुने भएका छन् । जिम लगायतका उच्च जोखिमपूर्ण विजनेशहरु पनि भोलिदेखि बन्द हुने भएका छन् । रेष्टुरेण्टमा आउटडोरमात्र खानाखान पाइनेछ । बाहिर वा भित्र १० जनाभन्दा बढी व्यक्ति भेला हुन पाइनेछैन । पूजास्थलमा क्षमताको ३३ प्रतिशत वा २५ जनाभन्दा बढी भेला हुन पाइनेछैन ।
त्यस्तै पँहेलो क्षेत्रमा विद्यालयहरु खुला रहनेछन् तर कोरोना परीक्षण अनिवार्य गर्नुपर्नेछ । विजनेशहरु खुला रहनेछन् तर सावधानी अपनाउनुपर्नेछ । रेष्टुरेण्टमा भित्र र बाहिर खानाखान अनुमति दिइनेछ तर हरेक टेबुलमा ४ जनाभन्दा बढी बस्न पाइनेछैन । २५ जनाभन्दा बढी जमघट हुन पाइनेछैन । पूजास्थलमा क्षमताको ५० प्रतिशतभन्दा बढी व्यक्ति भेला हुन पाइनेछैन ।