Follow @khasokhasmag

राहत प्याकेजबारेको वार्ता समाप्त, चुनावसम्म वार्ता अगाडि नबढाउन ट्रम्पको निर्देशन


प्रकाशित मिति : आश्विन २१, २०७७ बुधबार

अमेरिकी राष्ट्रपति डोनाल्ड ट्रम्पले आफ्ना वार्ताकारहरुलाई नयाँ राहत प्याकेजबारेको बार्ता चुनावसम्म अगाडि नबढाउन निर्देशन दिएको बताएका छन् । अमेरिकनहरुले राहत प्याकेजको आशा गरिरहेका बेलामा ट्रम्पले ह्वाइटहाउसका वार्ताकारहरुलाई वार्ता स्थगित गर्न भनेपछि चुनाव अगाडि राहतको आशा लगभग समाप्त भएको छ ।

ट्रम्पको यस्तो निर्णयले एयरलाइन्स लगायत कोरोनाको महामारीका कारण सबैभन्दा ठूलो असर परेका उद्योगहरुमा अन्यौल छाएको छ । हाउस स्पीकर न्यान्सी पेलोसी र ट्रेजरी सेक्रेटरी स्टेभन मन्चिनबीच नयाँ सिराबाट सहमतिको प्रयास भइरहँदा ट्रम्पले वार्ता स्थगन गर्न भनेका हुन् ।

सहमतिका लागि ह्वाइटहाउस र डेमोक्र्याट्सहरुबीच अगस्तदेखि नै विभिन्न चरणका वार्ताहरु भइरहेका थिए । तर पनि अहिलेसम्म कुनै सहमति भने कायम हुन सकेको थिएन । ट्रम्पले चुनावसम्मका लागि वार्ता स्थगित गरिएको र चुनाव आफूले जित्न बित्तिकै राहत प्याकेज पारित गर्ने तथा मिहिनेती अमेरिकन र साना ब्यापारहरुलाई सहयोग गर्ने बताएका छन् ।

डेमोक्र्याट्सहरु २ दशमलव २ ट्रिलियनको राहत प्याकेजमा झरेपनि रिपब्लिकनहरु र ह्वाइटहाउसहरु १ ट्रिलियनभन्दा माथि बढ्न नसक्दा सहमति कायम हुन सकेको छैन । काम गुमाएकाहरुले पाएको साप्ताहिक अतिरिक्त ६ सय डलरको अवधि जुलाईको अन्त्यमा नै समाप्त भइसकेको छ । कोरोनाको महामारी अहिले पनि अमेरिकामा व्यप्त रहको छ ।

ह्वाइटहाउसमा कोरोनाका नयाँ नयाँ संक्रमणहरु देखिएका छन् । पछिल्लो चरणमा ट्रम्पका बरिष्ठ सल्लाहकार स्टेफन मिलरलाई पनि कोरोना संक्रमण पुष्टी भएको छ । ट्रम्पका निकटवर्ती दर्जन भन्दा बढीलाई संक्रमण पुष्टी भइसकेको छ । अमेरिकामा कोरोनाबाट मृत्यु हुनेको संख्या पनि २ लाख नाघिसकेको छ ।

© 2022 KHASOKHAS®. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com