न्युयोर्क सिटीका ९ जिपकोडमा संक्रमण बढेपछि शटडाउन गर्ने मेयरको योजना गभर्नरबाट अस्वीकार
प्रकाशित मिति : आश्विन १९, २०७७ सोमबार
न्युयोर्क सिटीका ९ वटा जिपकोडमा कोरोनाको संक्रमण ३ प्रतिशत नाघेपछि चिन्ता बढेको छ । यी जिपकोडहरुमा शटडाउनका लागि न्युयोर्क सिटीका मेयर बिल ब्लाजिओले गरेको प्रस्ताव भने गभर्नर एन्ड्रयु कुमोले अस्वीकार गरेका छन् ।
बु्रकलिन र क्वीन्सका केही क्षेत्रमा कोरोनाको संक्रमण बढेपछि मेयरले ती क्षेत्रहरु शटडाउन गर्ने बताएका थिए । तर गभर्नरले भने ती जिपकोडहरुमा मात्र शटडाउन गर्दा समस्या हुने भएकाले शटडाउन गर्न नहुने बताएका छन् । दुई नेताका दुईथरी कुराले जनता, ब्यापारीहरु र स्कुल जाने बालबालिकाका अभिभावकहरु भने अन्यौलमा परेका छन् ।
गभर्नरको योजना मंगलबारसम्म आउने अपेक्षा गरिएको छ । कुमोले पनि के गर्दा उचित हुने भन्ने सन्दर्भमा पुनरावलोकन भइरहेको बताएका छन् । जिपकोड कुनै क्षेत्रको उचित परिभाषा नहुने भएकाले त्यो भन्दा वैज्ञानिक र उचित तरिका अपनाउनुपर्ने पक्षमा कुमो रहेका छन् ।
ब्रुकलिनका ११२०४, ११२१०, ११२२३, ११२३०, ११२१९ र ११२२९, क्वीन्सका ११३६७, ११४१५, ११६९१ जिपकोडमा कोरोना संक्रमण ३ प्रतिशतदेखि माथि साढे ८ प्रतिशतसम्म पुगेको छ । बोरो पार्कमा कोरोना संक्रमण ८ दशमलव ४९ प्रतिशतसम्म पुगेको छ । क्वीन्सका क्यु गार्डेन, फार रकवे लगायतका स्थानमा पनि ३ प्रतिशतभन्दा माथि रहेको छ ।
कुनै बेलाको कोरोना महामारीको ईपीसेन्टर न्युयोर्क सिटीमा कोरोनाको महामारी फेरी बढ्न थालेसँगै त्रास पनि बढ्न थालेको छ । चिसो मौषम सुरुहुँदै गर्दा कोरोना संक्रमण बढ्न थालेपछि खासगरी बालबालिका विद्यालय पठाउने अभिभावकहरुमा थप त्रास बढेको छ ।