‘ट्रम्पलाई अस्पताल लगेपछि अक्सिजन दिनुपरेको थियो’
प्रकाशित मिति : आश्विन १९, २०७७ सोमबार
अमेरिकी राष्ट्रपति डोनाल्ड ट्रम्पलाई कोरोना संक्रमणपछि अस्पतालमा भर्ना गरिएलगत्तै शनिबार अक्सिजन समेत दिनुपरेको जनाइएको छ । ह्वाइट हाउसका चिकित्सक सिन कोन्लेले ट्रम्पलाई शनिबार अक्सिजन दिनुपरेको जानकारी दिएका हुन् ।
यसअगाडि ट्रम्पलाई अक्सिजन दिनुपरेको कुरा अस्वीकार गरिदै आएको थियो । ह्वाइटहाउसका चिफ अफ स्टाफ मार्क मेडोजले ट्रम्पको अवस्था चिन्ता गर्न लायक भएको बताएका थिए । शुक्रबारयता ट्रम्पलाई एन्टीभाइरल रेम्डेसिभियरको दोश्रो डोज पनि दिइएको छ ।
शुक्रबार अस्पतालमा भर्ना भइसकेपछि ट्रम्पको रगतमा अक्सिजनको स्तर घटेको जनाइएको छ । साथै ट्रम्पलाई ज्वरो समेत आएको थियो । अक्सिजनको स्तर ९३ प्रतिशतसम्म घटेको जनाइएको छ । सामान्यतया ९५ प्रतिशतभन्दा कम भएमा अक्सिजनको स्तर असमान्य मानिन्छ ।
ट्रम्पको फोक्सोको अवस्थाबारे सोधिएको प्रश्नबारे भने ह्वाइटहाउसका चिकित्सक कोन्लेले जवाफ दिएनन् । ट्रम्पलाई सोमबार अस्पतालबाट डिस्चार्ज गर्ने बताइएपनि अझै केही समय लाग्ने सम्भावना देखिएको छ । यद्यपी ट्रम्पको अवस्थामा सुधार आइरहेको जनाइएको छ ।
कोरोना संक्रमणपछि वाल्टर रिड मेडिकल सेन्टरमा उपचाररत अमेरिकी राष्ट्रपति डोनाल्ड ट्रम्प आइतबार बेलुका अस्पताल बाहिर जम्मा भएका समर्थकहरुमाझ पुगेका थिए । उनी चढेको गाडी समर्थकहरुमाझबाट अगाडि बढेको थियो भने ट्रम्पले गाडीभित्रैबाट समर्थकहरुलाई हात हल्लाएका थिए ।
समर्थकमाझ यसरी आउँदा संचारमाध्यमहरुलाई पनि कुनै जानकारीदिइएको थिएन । अस्पतालबाहिर केही दर्जन समर्थकहरु उपस्थीत रहेका थिए । गाडी अत्यन्तै सुस्त गतिमा गुडाइएको थियो भने ट्रम्पलाई देखेपछि समर्थकहरु निकै उत्साहित र उत्तेजित समेत भएका थिए ।
यसअगाडि ट्वीटरमा एउटा भिडियो पोष्ट गर्दै उनले समर्थकमाझ आकस्मीक रुपमा उपस्थीत हुने बताएका थिए । ट्रम्पले गाडीभित्र मास्क लगाएका थिए भने उनका चालकले पनि मास्क लगाएका थिए ।
यसरी बाहिर निस्केर उनले आफ्ना समर्थकहरु, अमेरिका र विश्वलाई आफू संक्रमित भएपनि ठीकठाक नै रहेको तथा अवस्था गम्भिर नरहेको सन्देश दिन खोजेको विश्लेषण गरिएको छ ।
बिहिबार मध्यराती कोरोना संक्रमण पुष्टी भएका अमेरिकी राष्ट्रपति डोनाल्ड ट्रम्पलाई शुक्रबार विहानदेखि ज्वरो आएपछि केही दिनका लागि राष्ट्रिय सैन्य चिकित्सा केन्द्र वाल्टर रिडमा भर्ना गरिएको हो ।
ह्वाइट हाउसले ट्रम्पलाई अस्पतालमा भर्ना गर्ने कदम सावधानीका लागि लिइएको तर आपतकालिन रुपमा स्वास्थ्यमा कुनै समस्या आएका कारण नभएको ह्वाइट हाउसले स्पष्ट पारेको थियो ।