राहत प्याकेज पारित गर्न संसदलाई अस्पतालबाटै राष्ट्रपति ट्रम्पको आव्हान
प्रकाशित मिति : आश्विन १७, २०७७ शनिबार
कोरोना संक्रमणपछि अस्पतालमा भर्ना भएका अमेरिकी राष्ट्रपति डोनाल्ड ट्रम्पले अस्पतालबाटै संसदलाई कोरोनाको राहत प्याकेज पारित गर्न दवाव दिएका छन् । उनले अस्पतालबाटै ट्वीट गर्दै अमेरिकी जनतालाई राहत आवश्यक भएको बताएका छन् । एकसाथ काम गरेर यसबारे टुंगो लगाउन ट्रम्पले आव्हान गरेका छन् ।
OUR GREAT USA WANTS & NEEDS STIMULUS. WORK TOGETHER AND GET IT DONE. Thank you!
— Donald J. Trump (@realDonaldTrump) October 3, 2020
ट्रम्पको यस्तो आव्हानपछि राहत सम्झौता स्वीकार गर्नका लागि रिपब्लिकनहरुलाई सहज हुने अपेक्षा गरिएको छ । अहिलेसम्मबारे कोरोना राहत प्याकेजबारे कुनै सहमति हुन सकेको छैन । झण्डै दुईमहिनादेखिको सहमतिको प्रयास सफल हुन सकेको छैन ।
राहत प्याकेजमा सहमति नहुँदै अमेरिकी संसदको प्रतिनिधिसभाको भने छुट्टी सुरु भइसकेको छ । डेमोक्रेटिक सांसदहरु र ह्वाइटहाउसबीच कुनै सहमति कायम नहुँदै प्रतिनिधिसभाको छुट्टी सुरु भएपछि सांसदहरु आफ्ना डिस्ट्रिक्टहरुमा फर्कने भएका छन् ।
हाउस स्पीकर न्यान्सी पेलोसीले भने ह्वाइटसँगको वार्ता जारी रहने र छिट्टै सहमति कायम हुने अपेक्षा व्यक्त गरेकी छिन् । ह्वाइट हाउससँग केहीदिन अगाडिदेखि सुरु भएको वार्तामा अन्तिम सहमति भने कायम हुन सकेको छैन ।
डेमोक्रेटिक सांसदहरुले ल्याएको २ दशमलव २ ट्रिलियन डलरको नयाँ बिल अमेरिकी संसदको तल्लो सदन प्रतिनिधिसभाबाट पारित भइसकेको छ । बिलमा अमेरिकामा दोश्रो चरणको १२ सय डलरको राहत चेक र काम गुमाएकाहरुलाई अतिरिक्त साप्ताहिक ६ सय डलर समेटिएको छ ।
यसअगाडि डेमोक्रेटिक सांसदहरुले हाउसबाट ३ दशमलव ४ ट्रिलियन डलरको बिल पारित गरेका थिए । तर रिपब्लिकनहरु यति ठूलो बिलको पक्षमा नभएपछि उक्त बिल सिनेटमा अगाडि बढ्न सकेको थिएन ।
अहिले त्यसमा १ ट्रिलियन डलरभन्दा बढी रकम कम गरेर बिल पारित गरिएको छ । आफूहरु १ ट्रिलियन घटेकाले रिपब्लिकनहरु १ ट्रिलियन बढेर उक्त बिलमा सहमति जनाउन डेमोक्रेटिक सांसदहरुले आग्रह गरेका छन् ।
यो बिलमा सेप्टेम्बर ६ देखि नै लागु हुनेगरी आगामी जनवरी ३१ सम्म काम गुमाएकाहरुलाई बेरोजगारी विमा वा महामारी बेरोजगारी सहायताका अतिरिक्त साप्ताहिक ६ सय डलर दिने प्रावधान समेटिएको छ । साथै १२ सय डलरको दोश्रो चरणको राहत चेक दिने र आश्रीतहरुलाई अतिरिक्त ५ सय डलर दिने पनि बिलमा समेटिएको छ ।
स्थानीय र राज्य सरकारहरुलाई अतिरिक्त सहायताका लागि ४३६ बिलियन डलर दिने र पेचेक प्रोटेक्सन प्रोग्राम पनि चालु गर्ने विषय विलमा समावेश छ । विद्यालयहरुलाई सहायताका लागि २२५ बिलियन डलर र कोरोनाको परीक्षण र ट्रेसिंगका लागि ७५ बिलियन डलर प्रदान गर्ने विषय बिलमा छ ।
प्रतिनिधिसभामा बिलमा पक्षमा २१४ र विपक्षमा २०७ मत खसेको थियो । ११ जना डेमोक्रेटिक सांसदहरुले बिलको विपक्षमा मतदान गरेका थियो ।
ह्वाइट हाउस र हाउस स्पीकर न्यान्सी पेलोसीबीच सहमतिका वार्ताहरु भइरहँदा यो बिल पारित भएको हो । ह्वाइट हाउस भने काम गुमाएकाहरुलाई सेप्टेम्बर १२ देखि लागु हुनेगरी साप्ताहिक ४ सय डलर दिने व्यवस्था सहितको १ दशमलव ६ ट्रिलियन डलरको राहत प्याकेजको पक्षमा छ ।
चुनाव नजिकिदै गर्दा सांसदहरु आआफ्ना क्षेत्रमा फर्केर चुनावमा लाग्नुपर्ने भएकाले राहत प्याकेज छिटो पारित हुन नसके चुनाव अगाडि पारित हुननसक्ने परिदृश्य समेत रहेको छ ।
पेलोसीले पूर्ण सहमति कायम नभएपनि केही विषयमा भने सहमति कायम भएको बताएकी छिन् । तर सबै विषयमा सहमति नभएसम्म यसलाई सहमति भन्न नसकिने उनको भनाई छ ।
राष्ट्रपति डोनाल्ड ट्रम्पले कार्यकारी आदेशमार्फत प्रदान गरिएको साप्ताहिक ३ सय डलरको अवधि समाप्त भइसकेको छ । ह्वाइट हाउस त्यसको एक सातापछि सेप्टेम्बर १२ बाट साप्ताहिक ४ सय डलर दिनुपर्ने पक्षमा रहेको छ । तर डेमोक्र्याट्सहरु सेप्टेम्बर ६ पछि लागु हुनेगरी साप्ताहिक ६ सयको व्यवस्था हुनुपर्ने र यस्तो व्यवस्था जनवरी ३१ सम्म लागु हुनुपर्ने पक्षमा छन् ।
दोश्रो चरणको १२ सय डलरको राहत चेक उपलब्ध गराउने पक्षमा भने सबै पक्षहरु सहमत रहेका छन् ।