ट्रम्पलाई परीक्षणकै क्रममा रहेको ‘एन्टबडी कक्टेल’ को सिंगल डोज


प्रकाशित मिति : आश्विन १६, २०७७ शुक्रबार

कोरोना संक्रमण पुष्टी भएपछि अमेरिकी राष्ट्रपति डोनाल्ड ट्रम्पलाई परीक्षणात्मक एन्टबडी कक्टेलको सिंगल डोज दिइएको छ । बायोटेक रिजेनेरोनले बनाएको उक्त एन्टीबडी कक्टेल परीक्षणकै क्रममा रहेको छ । कोरोनाको कुनै स्वीकृत उपचार नभएपनि रिजेनेरोनको एन्टीबडी उपचार विश्वासिलो मानिएको छ ।

अहिलेसम्म यो विधिबाट उपचार गर्दा बिरामीहरुमा भाइरसको स्तर कम भएको र अस्पतालको बसाई छोटो भएको देखिएको छ । कोरोना संक्रमणको सुरुवाती चरणमा एन्टीबडी कक्टेलको डोज दिंदा बिरामीमा उल्लेख्य सकारात्मक प्रभाव परेको देखिएको छ । यद्यपी यो उत्पादन अमेरिकाको एफडीएबाट आपतकालिन प्रयोगका लागि समेत स्वीकृत भइसकेको छैन ।

ट्रम्पका चिकित्सकले ट्रम्पले थकित अनुभव गरेको बताएपनि उच्च आत्मबल रहेको बताएका छन् । ट्रम्पले जिंक, भिटामिन डी, फेमोटिडिन, निद्रा लाग्ने मेलाटोनिन र दैनिक एस्पीरिनको औषधी लिइरहेका छन् ।

बिहिबार मध्यराती कोरोना संक्रमण पुष्टी भएका अमेरिकी राष्ट्रपति डोनाल्ड ट्रम्पलाई शुक्रबार विहानदेखि ज्वरो आएपछि केही दिनका लागि राष्ट्रिय सैन्य चिकित्सा केन्द्र वाल्टर रिडमा भर्ना गरिएको छ ।

ह्वाइट हाउसले ट्रम्पलाई अस्पतालमा भर्ना गर्ने कदम सावधानीका लागि लिइएको तर आपतकालिन रुपमा स्वास्थ्यमा कुनै समस्या आएका कारण नभएको ह्वाइट हाउसले स्पष्ट पारेको छ । ट्रम्प बिरामी भएपनि कार्यवाहकको जिम्मेबारी उपराष्ट्रपति माइक पेन्सलाई नदिइने भएको छ । ट्रम्प नै इन्चार्ज रहने भएका छन् ।

शुक्रबारदेखि ज्वरो आएपनि त्यसलाई सामान्य लक्षणका रुपमा मात्र लिइएको छ ।

प्रथम महिला मेलानिया ट्रम्पलाई भने ज्वरोको साथमा हल्का खोकीपनि लागिरहेको जनाइएको छ । अमेरिकी राष्ट्रपतिको चुनाव आउन झण्डै एकमहिना बाँकी रहँदा ट्रम्प दम्पत्तिमा कोरोना संक्रमण देखिएको हो ।

केहीदिन अगाडिको बहसमा सहभागी अमेरिकी राष्ट्रपतिका लागि डेमोक्रेटिक उम्मेदवार जो बाइडेनको कोरोना परीक्षणको नतिजा भने नेगेटिभ आएको छ । ट्रम्पलाई कोरोना संक्रमण भएपछि बाइडेनको पनि परीक्षण गरिएको थियो ।

बाइडेनले आफ्नो र श्रीमती जिल बाइडेनको कोरोना परीक्षणको नतिजा नेगेटिभ आएको सामाजिक सञ्जालमार्फत जानकारी दिएका छन् । बाइडेनको आफ्नो नतिजा नेगेटिभ आएको जानकारी दिदै मास्क लगाउन, सामाजिक दुरी कायम गर्न र हात धुन सुझाव दिएका छन् ।

ट्रम्पका १४ बर्षका छोरा, छोरी र ज्वाईलाई भने कोरोना संक्रमण देखिएको छैन । उनीहरुको परीक्षणको नतिजा नेगेटिभ देखिएको छ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com