अस्पतालमा भर्ना हुनुअगाडि ट्रम्पले सार्वजनिक गरे यस्तो भिडियो सन्देश
प्रकाशित मिति : आश्विन १६, २०७७ शुक्रबार
राष्ट्रिय सैन्य चिकित्सा केन्द्र वाल्टर रिडमा भर्ना गरिएका अमेरिकी राष्ट्रपति डोनाल्ड ट्रम्पले अस्पताल पुग्नासाथ पहिले नै रेकर्ड गरिएको एउटा भिडियो ट्वीट गरेका छन् । जसमा उनले अमेरिकनहरुलाई समर्थनका लागि धन्यवाद दिएका छन् ।
भिडियोमा उनले भनेका छन् – ‘मप्रतिको समर्थनका लागि सबैलाई धन्यवाद दिन चाहन्छु। म वाल्टर रीड अस्पताल भर्ना हुँदैछु । मलाई लाग्छ म राम्रो गरिरहेछु, तर हामी यो निश्चित गर्नेछौं कि काम बन्नेछ ।’
ट्रम्पले भिडियोमा अगाडि भनेका छन् – ‘प्रथम महिलाले पनि धेरै राम्रो गरिरहेकी छिन् । त्यसैले धेरै धेरै धन्यवाद । म यसको कदर गर्छु । यो कहिलेपनि भूल्ने छैन । धन्यवाद ।’
— Donald J. Trump (@realDonaldTrump) October 2, 2020
बिहिबार मध्यराती कोरोना संक्रमण पुष्टी भएका अमेरिकी राष्ट्रपति डोनाल्ड ट्रम्पलाई शुक्रबार विहानदेखि ज्वरो आएपछि केहीदिनका लागि राष्ट्रिय सैन्य चिकित्सा केन्द्र वाल्टर रिडमा भर्ना गरिएको छ ।
अस्पतालमा भर्ना गर्ने कदम सावधानीका लागि लिइएको तर आपतकालिन रुपमा स्वास्थ्यमा कुनै समस्या आएका कारण नभएको ह्वाइट हाउसले स्पष्ट पारेको छ । ट्रम्प बिरामी भएपनि कार्यवाहकको जिम्मेबारी उपराष्ट्रपति माइक पेन्सलाई नदिइने भएको छ । ट्रम्प नै इन्चार्ज रहने भएका छन् । उपराष्ट्रपति माइक पेन्सको कोरोना परीक्षणको नतिजा नेगेटिभ आइसकेको छ ।
शुक्रबारदेखि ज्वरो आएपनि त्यसलाई सामान्य लक्षणका रुपमा मात्र लिइएको छ । ट्रम्पका चिकित्सकले ट्रम्पले थकित अनुभव गरेको बताएपनि उच्च आत्मबल रहेको बताएका छन् । ट्रम्पले जिंक, भिटामिन डी, फेमोटिडिन, निद्रा लाग्ने मेलाटोनिन र दैनिक एस्पीरिनको औषधी लिइरहेका छन् ।
प्रथम महिला मेलानिया ट्रम्पलाई भने ज्वरोको साथमा हल्का खोकीपनि लागिरहेको जनाइएको छ । अमेरिकी राष्ट्रपतिको चुनाव आउन झण्डै एकमहिना बाँकी रहँदा ट्रम्प दम्पत्तिमा कोरोना संक्रमण देखिएको हो ।
केहीदिन अगाडिको बहसमा सहभागी अमेरिकी राष्ट्रपतिका लागि डेमोक्रेटिक उम्मेदवार जो बाइडेनको कोरोना परीक्षणको नतिजा भने नेगेटिभ आएको छ । ट्रम्पलाई कोरोना संक्रमण भएपछि बाइडेनको पनि परीक्षण गरिएको थियो ।
बाइडेनले आफ्नो र श्रीमती जिल बाइडेनको कोरोना परीक्षणको नतिजा नेगेटिभ आएको सामाजिक सञ्जालमार्फत जानकारी दिएका छन् । बाइडेनको आफ्नो नतिजा नेगेटिभ आएको जानकारी दिदै मास्क लगाउन, सामाजिक दुरी कायम गर्न र हात धुन सुझाव दिएका छन् ।
ट्रम्प र बाइडेनबीचको बहसका क्रममा ट्रम्पले मास्क लगाउने लगायतका मापदण्ड पालना गर्नमा गम्भिरता नदेखाएको विषय आएको थियो । त्यतिबेला ट्रम्पले आफूले आवश्यक परेको बेलामा मास्क लगाउने गरेको भन्दै खल्तीबाट मास्क झिकेर देखाएका थिए । साथै २ सय मिटर पर बस्दा समेत मास्क लगाउने गरेको भन्दै ट्रम्पले बाइडेनको मजाक उडाएका थिए ।
ट्रम्पका १४ बर्षका छोरा, छोरी र ज्वाईलाई भने कोरोना संक्रमण देखिएको छैन । उनीहरुको परीक्षणको नतिजा नेगेटेभि देखिएको छ ।