राष्ट्रपति उम्मेदवार बाइडेनको कोरोना परीक्षणको नतिजा नेगेटिभ
प्रकाशित मिति : आश्विन १६, २०७७ शुक्रबार
अमेरिकी राष्ट्रपतिका लागि डेमोक्रेटिक उम्मेदवार जो बाइडेनको कोरोना परीक्षणको नतिजा नेगेटिभ आएको छ । ट्रम्पलाई कोरोना संक्रमण भएपछि केही दिन अगाडि सँगै बहसमा भाग लिएका बाइडेनको पनि परीक्षण गरिएको थियो ।
बाइडेनले आफ्नो र श्रीमती जिल बाइडेनको कोरोना परीक्षणको नतिजा नेगेटिभ आएको सामाजिक सञ्जालमार्फत जानकारी दिएका छन् । बाइडेनको आफ्नो नतिजा नेगेटिभ आएको जानकारी दिदै मास्क लगाउन, सामाजिक दुरी कायम गर्न र हात धुन सुझाव दिएका छन् ।
I’m happy to report that Jill and I have tested negative for COVID. Thank you to everyone for your messages of concern. I hope this serves as a reminder: wear a mask, keep social distance, and wash your hands.
— Joe Biden (@JoeBiden) October 2, 2020
ट्रम्प र बाइडेनबीचको बहसका क्रममा ट्रम्पले मास्क लगाउने लगायतका मापदण्ड पालना गर्नमा गम्भिरता नदेखाएको विषय आएको थियो । त्यतिबेला ट्रम्पले आफूले आवश्यक परेको बेलामा मास्क लगाउने गरेको भन्दै खल्तीबाट मास्क झिकेर देखाएका थिए । साथै २ सय मिटर पर बस्दा समेत मास्क लगाउने गरेको भन्दै ट्रम्पले बाइडेनको मजाक उडाएका थिए ।
अमेरिकी राष्ट्रपति डोनाल्ड ट्रम्प दम्पत्तिलाई गएराती कोरोना संक्रमण पुष्टी भएको हो । त्यसपछि ट्रम्प दम्पत्ति ह्वाइटहाउसकै निवासमा क्वारेन्टीनमा बसेका छन् । ट्रम्पलाई सामान्य लक्षणमात्र देखिएकाले क्वारेन्टीनबाटै कामकाज गर्ने जनाइएको छ ।
यस अगाडि जो बाइडेनले एक ट्वीट गर्दै ट्रम्पको स्वास्थ्यलाभको कामना समेत गरेका छन् ।
Jill and I send our thoughts to President Trump and First Lady Melania Trump for a swift recovery. We will continue to pray for the health and safety of the president and his family.
— Joe Biden (@JoeBiden) October 2, 2020