ट्रम्पलाई कोरोना संक्रमणको लक्षण सामान्यमात्रै, ह्वाइटहाउसमै क्वारेन्टीन


प्रकाशित मिति : आश्विन १६, २०७७ शुक्रबार

White house

अमेरिकी राष्ट्रपति डोनाल्ड ट्रम्प र प्रथम महिला मेलानियालाई गएराती कोरोना संक्रमण पुष्टी भएपनि उनीहरुमा लक्षण भने सामान्यमात्रै रहेको अधिकारीहरुले बताएका छन् । विहिबार मध्यरात लगत्तै १ बज्नुभन्दा केही अगाडि राष्ट्रपति ट्रम्पले आफू र मेलानिया ट्रम्पलाई कोरोना संक्रमण पुष्टी भएको ट्वीटरमार्फत जानकारी दिएका थिए ।

ह्वाइट हाउसका बरिष्ठ सल्लाहकार होप हिक्समा कोरोना संक्रमण पुष्टी भएपछि अमेरिकी राष्ट्रपति डोनाल्ड ट्रम्प र प्रथम महिला मेलानिया ट्रम्पको पनि कोरोना परीक्षण गरिएको थियो । सल्लाहकार होप हिक्ससँग राष्ट्रपति ट्रम्प दम्पत्तिले उल्लेख्य समय विताएका थिए ।

पत्रकारहरुलाई राती १ बजे जारी एउटा मेमोमा ट्रम्प दम्पत्तिलाई कोरोना संक्रमण पुष्टी भएको राष्ट्रपतिका चिकित्सक नेभी कमाण्डर डाक्टर सिन कोन्लेले बताएका थिए । स्वास्थ्यलाभको दौरान ट्रम्प दम्पत्ति ह्वाइटहाउभित्रै क्वारेन्टीनमा रहने जनाइएको छ ।

ट्रम्पलाई कोरोना संक्रमणका सामान्य लक्षणहरुमात्र रहेकाले ह्वाइट हाउसकै निवासबाट काम गर्ने योजना बनाइरहेको जनाइएको छ । ह्वाइट हाउसका अधिकारीहरुले ट्रम्पलाई दिएको लक्षण एकदमै सामान्यमात्र रहेको बताएका छन् । तर सामान्य लक्षणहरु के के हुन् भन्नेबारे खुलाइएको छैन ।

ट्रम्पका छोरी ज्वाई इभान्का ट्रम्प र जारेड कुश्नरलाई भने कोरोना संक्रमण नभएको पुष्टी भएको छ । त्यस्तै १४ बर्षका छोरा ब्यारोन ट्रम्पलाई पनि कोरोना संक्रमण देखिएको छैन ।

अमेरिकी राष्ट्रपति चुनाव आउन झण्डै एकमहिनामात्र बाँकी रहँदा राष्ट्रपति ट्रम्पलाई कोरोना संक्रमण पुष्टी भएको छ । राष्ट्रपतिका उम्मेदवारहरुबीचको दोश्रो बहस अक्टोबर १५ मा तय भएको छ । उक्त बहस स्थगित हुने नहुनेबारे पनि केही बताइएको छैन ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com