इलेक्टोरल कलेजबाट ट्रम्प वा बाइडेन दुबैले नजिते संसदबाट राष्ट्रपछि छान्न पेलोसीको तयारी
प्रकाशित मिति : आश्विन ११, २०७७ आईतबार
इलेक्टोरल कलेजबाट डोनाल्ड ट्रम्प वा जो बाइडेन दुबैले नजिते संसदबाट राष्ट्रपछि छान्न हाउस स्पीकर न्यान्सी पेलोसीले तयारी सुरु गरेकी छिन् । इलेक्टोरल कलेज बराबर भएको खण्डमा हाउसबाट राष्ट्रपतिको निर्णय गर्नका लागि तयार रहन पेलोसीले सांसदहरुलाई सुचित गरेकी छिन् ।
अमेरिकी राष्ट्रपतिमा निर्वाचित हुनका लागि २७० इलेक्टोरल मत ल्याउन आवश्यक हुन्छ । यदि कुनै पनि उम्मेदवारले स्पष्ट बहुमत ल्याउन नसकेको खण्डमा प्रतिनिधिसभाले राष्ट्रपति छान्न सक्ने अधिकार रहेको छ । तर चुनावपछिको नयाँ प्रतिनिधिसभाबाट राष्ट्रपति छान्ने प्रावधान रहेको छ ।
यसपटकको चुनावमा प्रतिनिधिसभाका सबै ४३५ सिटमा नै मतदान हुँदैछ । त्यसकारण चुनावपछि प्रतिनिधिसभाको परिदृश्य अहिलेको भन्दा फरक पनि हुनसक्नेछ । अमेरिकाको प्रतिनिधिसभामा अहिले डेमोक्र्याट्सहरुको बहुमत रहेको छ ।
अमेरिकी इतिहासमा यस्तो तीनपटकसम्म भएको छ । सन् १८०० को राष्ट्रपति चुनावमा, सन् १८२४ को राष्ट्रपति चुनावमा र १८३६ को उपराष्ट्रपति चुनावमा यस्तो आकस्मिक अवस्था श्रृजना भएको थियो । यस्तो अवस्था आउँदा राष्ट्रपति चुन्ने अधिकार हाउसलाई र उपराष्ट्रपति चुन्ने अधिकार सिनेटलाई प्राप्त हुन्छ ।
कहिलेकाँही इलेक्टरहरुले धोका दिएको खण्डमा समेत २७० मत प्राप्त नहुने अवस्था आउनसक्छ । २०१६ को चुनावमा केही इलेक्टरहरुले भोट हाल्न अस्वीकार समेत गरेका थिए ।