न्युयोर्क राज्यमा कोरोना संक्रमितको संख्या बढेर जुन ५ यताकै सबैभन्दा धेरै
प्रकाशित मिति : आश्विन १०, २०७७ शनिबार
न्युयोर्क राज्यमा कोरोना संक्रमितको संख्या बढेर जुन ५ यताकै सबैभन्दा धेरै पुगेको छ । न्युयोर्कका गभर्नर एन्ड्रयु कुमोले शुक्रबार झण्डै साढे ३ महिना यताकै सबैभन्दा धेरैजना संक्रमित पुष्टी भएको जानकारी दिएका छन् ।
जुन ५ यता एकैदिनमा न्युयोर्कमा एकहजार बढी संक्रमित पुष्टी भएको यो नै पहिलोपटक हो । शुक्रबार ९९ हजार ९ सय ५३ जनामा परीक्षण गरिएकोमा एकहजार ५ मा कोरोना संक्रमण पुष्टी भएको थियो ।
जुलाईको अन्तिमदेखि सेप्टेम्बरको सुरुवातसम्म औषतमा हरेक दिन ६६० जना संक्रमित पुष्टी भएका थिए । तर शुक्रबारसम्मको सातदिनको अवधिमा औषत दरपनि बढेर ८१७ पुगेको छ ।
न्युयोर्कको ब्रुकलिन र क्वीन्समा कोरोना संक्रमण बढ्यो, कुन स्थानमा कति?
न्युयोर्क सिटीको ब्रुकलिन र क्वीन्सका कैयन स्थानमा कोरोना संक्रमणमा उल्लेख्य बृद्धि भएको छ । कैयन स्थानमा झण्डै ७ प्रतिशतसम्म कोरोना संक्रमण देखिएपछि चिन्ता व्यक्त गरिएको छ ।
न्युयोर्कको ग्रेभसेण्ड र होमक्रिस्टमा परीक्षण गरिएकाहरुमध्ये ६ दशमलव ७३ प्रतिशतमा कोरोना संक्रमण देखिएको छ । मिडउडमा ५ दशमलव २२ प्रतिशतमा र क्यु गार्डेनमा ३ दशमलव ५३ प्रतिशतमा संक्रमण देखिएको छ ।
एजमेयर र फार रकवेमा ४ दशमलव शुन्य ३ प्रतिशतमा संक्रमण पुष्टी भएको छ । बोरो पार्कमा ४ दशमलव २ प्रतिशतमा संक्रमण देखिएको छ । म्यापेल्टन र बेन्सनह्रस्टमा ३ दशमलव ८१ प्रतिशतमा कोरोना संक्रमण देखिएको छ ।
त्यस्ते रेगो पार्कमा २ दशमलव ४६ प्रतिशतमा कोरोना संक्रमण देखिएको छ । क्यु गार्डेन हिल्स र पोमोनोकमा २ दशमलव ३६ प्रतिशत संक्रमण देखिएको छ । केन्सिङटन र विन्डस्र टेरेसमा २ दशमलव ३१ प्रतिशतमा संक्रमण देखिएको छ । म्यानहटन बीच क्षेत्रमा २ दशमलव २१ प्रतिशतमा संक्रमण देखिएको छ ।