२० लाख बढी न्युयोर्कबासीलाई पठाइयो ९ सय डलर, अनलाइन एकाउन्टमार्फत हेर्न सकिने
प्रकाशित मिति : आश्विन १, २०७७ बिहीबार
कोरोना महामारीका कारण काम गुमाएका झण्डै २० लाख योग्य न्युयोर्कबासीहरु र सेप्टेम्बर १५ को बेलुका ५ बजेसम्म प्रमाणिकरण गरिसकेकाहरुलाई तीनसाताको ९ सय डलर पठाइएको छ । उक्त रकम शुक्रबार विहानसम्म खातामा देखिनेछ । केही बैंकहरुले भने प्रकृयामा लामो समय लगाउने भएकाले सोमबारसम्म खातामा देखिने भएको छ ।
न्युयोर्क डिपार्टमेन्ट अफ लेवरले रकम पठाए नपठाएको चेक अनलाइन एकाउन्टमार्फत गर्न सक्नुहुनेछ । यदि रकम पठाइसकेको खण्डमा तीनसाताको ९ सय डलर अनलाइन एकाउन्टको रकम पठाएको इतिहास सेक्सनमा गएर हेर्न सकिनेछ । पहिले नै योग्य नभएका र सेप्टेम्बर १५ को बेलुका ५ बजेसम्म प्रमाणिकरण नगरेकाहरुको सन्दर्भमा भने रकम प्राप्त हुन केही समय लाग्नेछ ।
अहिलेसम्म प्रमाणिकरण नगरेकाहरुले अझै पनि डकुसाइन वा फोनमार्फत प्रमाणिकरण गर्नसक्नेछन् । तर उनीहरुलाई पालैपालोगरी रकम पठाइने न्युयोर्क डिपार्टमेन्ट अफ लेवरले जनाएको छ ।
पहिले नै योग्य भएका र प्रमाणिकरण गर्न नपर्नेहरुलाई बेरोजगारी विमा वा महामारी बेरोजगारी सहायता रकमका अतिरिक्त साप्ताहिक ३ सय डलर पाउन योग्य रहेको इमेल न्युयोर्क डिपार्टमेन्ट अफ लेवरले पठाएको थियो । तर झण्डै ४ लाख ३५ हजारलाई भने उक्त रकम प्राप्त गर्न पुन प्रमाणिकरणका लागि इमेल पठाइएको थियो ।
उनीहरुलाई पनि डिपार्टमेन्ट अफ लेवरले डकुसाइनमार्फत इमेल पठाएको छ । इमेलमा डकुसाइनमार्फत लेबर डिपार्टमेन्टको इमेल आएको छ भने यथाशीघ्र प्रमाणिकरण गर्न सुझाव दिइएको छ । तर यदि पहिले नै योग्य भएको इमेल वा टेक्स्ट मेसेज पनि आएको छैन र डकुसाइनमार्फत प्रमाणिकरणको इमेल पनि आएको छैन भने ८३३ ४९१ ०६३२ मा फोन गरेर प्रमाणिकरण गर्नसकिन्छ ।
योग्य व्यक्तिले राष्ट्रपति डोनाल्ड ट्रम्पको कार्यकारी आदेश अनुशार अगस्त १ को सातादेखि नै तीनसातासम्मको रकम प्राप्त गर्नेछन् । योग्य भएको इमेल प्राप्त गरिसकेकाहरुले रकम प्राप्त गर्नका लागि कुनै कदम चाल्नुनपर्ने जनाइएको छ ।
झण्डै २४ लाख न्युयोर्कबासीहरु अतिरिक्त साप्ताहिक ३ सय डलरका लागि योग्य रहेको जनाइएको छ । उनीहरुलाई अहिले तीनसाताको ९ सय डलर एकमुष्ठ र अरु थप तीनसाताको रकम गरी कुल १८ सय डलर प्राप्त हुने सम्भावना रहेको छ । महामारीको समयमा न्युयोर्क राज्यले झण्डै ३५ लाखलाई झण्डै ४४ बिलियन डलर प्रदान गरिसकेको छ ।
अहिलेसम्म संघीय आपतकालिन व्यवस्थापन एजेन्सीले न्युयोर्कबासीहरुका लागि तीनसाताका लागि साप्ताहिक ३ सयका दरले रकम निकाशा गरिसकेको छ । अगस्त २, अगस्त ९ र अगस्त १६ को साताका लागि रकम निकाशा भइसकेको न्युयोर्क राज्यको डिपार्टमेन्ट अफ लेबरले जनाएको छ ।
