साप्तहिक ३ सय डलरसहितको रिपब्लिकन प्याकेजमा सिनेटमा मतदान, पक्षमा खसेन ६० मत
प्रकाशित मिति : भाद्र २५, २०७७ बिहीबार
अमेरिकी सिनेटमा रिपब्लिकनहरुले ल्याएको दोश्रो चरणको १२ सय डलरको राहत चेक नसमेटिएको राहत प्याकेजमा मतदान भएको छ । गत जुलाईमा समाप्त भएको काम गुमाएकाहरुलाई दिइएको अतिरिक्त रकम ६ सयलाई घटाएर ३ सय बनाइएको यो प्याकेजका पक्षमा ५२ मत खसेको छ ।
सुरुमा सिनेटमा ल्याइएको बिल पारित गर्न कम्तीमा ६० भोटको आवश्यकता पर्ने भएपनि डेमोक्र्याट्हसरुले साथ नदिएपछि बिल पारित भएन । बिलको विपक्षमा ४७ मत खसेको जनाइएको छ । सिनेटर र्याण्ड पलबाहेक सबै रिपब्लिकनहरुले बिलको पक्षमा मतदान गरेका थिए ।
सिनेटमा रिपब्लिकन नेता मिच म्याक्कोनेलले उक्त बिल अगाडि बढाएका थिए । बिलमा पेचेक प्रोटेक्सन प्रोग्रामका लागि भने २५८ बिलियन डलर छुट्याइएको थियो ।
बिलले काम गुमाएकाहरुलाई डिसेम्बर २७ सम्मका लागि अतिरिक्त साप्ताहिक ३ सयको व्यवस्था गरेको थियो भने डेढ लाख डलरभन्दा कम पीपीपी ऋण लिएका विजनेशहरुलाई मिनाहाका लागि सहज बनाएको थियो । त्यस्तै हुलाक सेवा र स्कुल लगायतका लागि समेत राहतको व्यवस्था गरिएको थियो ।
डेमोक्रेटिक र रिपब्लिकनहरुबीच अहिले कुनै पनि राहत प्याकेजमा सहमति कायम भएको छैन । अगस्तको पहिलोसातादेखि परेको गाँठो एकमहिना वितिसक्दापनि जस्ताको तस्तै छ । सिनेट यसैसाता काममा फर्किएको छ भने हाउस पनि केहीदिनमा काममा फर्कदैछ ।
यस अगाडि डेमोक्र्याट्सहरुले ल्याएको ३ दशमलव ४ ट्रिलियन डलरको हिरोज एक्ट हाउसबाट गत मे महिनामा नै पारित भएको थियो । तर त्यो सिनेटबाट अस्वीकृत भएको थियो । डेमोक्र्याट्सहरु एक ट्रिलियन डलर कम गरेर २ दशमलव २ ट्रिलियनमा झर्न तयार रहेका छन् तर ह्वाइटहाउस भने १ ट्रिलियन डलरब बढेर २ ट्रिलियनमा जान तयार भएको छैन ।
एकातिर अमेरिकी राष्ट्रपतिको चुनाव आउन २ महिनापनि बाँकी छैन । अर्कोतर्फ यो आर्थिक बर्ष सेप्टेम्बर ३० मा समाप्त हुँदैछ । यो अवस्थामा संसदमा कुनै पनि सहमति कायम हुन नसक्दा अमेरिकनहरु मारमा परिरहेका छन् ।