नोबेल शान्ति पुरस्कारका लागि अमेरिकी राष्ट्रपति डोनाल्ड ट्रम्प नोमिनेट
प्रकाशित मिति : भाद्र २४, २०७७ बुधबार
अमेरिकी राष्ट्रपति डोनाल्ड ट्रम्पलाई सन् २०२१ को नोबेल शान्ति पुरस्कारका लागि नोमिनेट गरिएको छ । नर्वेका सांसद तथा नाटो संसदीय सभाका लागि नर्वेजीयन प्रतिनिधिमण्डलका अध्यक्ष क्रिश्चियन टायब्रिंग गेजेडले ट्रम्पको नाम नोमिनेट गरेका हुन् ।
इजरायल र संयुक्त अरब इमिरेट्स बीचको शान्ति सम्झौतामा ट्रम्पको महत्वपूर्ण भूमिकालाई ध्यानमा राख्दै ट्रम्पलाई नोमिनेट गरिएको उनको भनाई छ । टायब्रिंगले सन् २०१८ मा पनि ट्रम्पलाई नोबेल शान्ति पुरस्कारका लागि नोमिनेट गरेका थिए ।
यस पुरस्कारका लागि मनोनित कुनै पनि सदस्यले विश्वव्यापी शान्ति स्थापना गर्न ट्रम्पले भन्दा बढी प्रयास नगरेको उनको दावी छ । ट्रम्पले इजरायल र युएई बीचमा सम्झौता मात्र नगराई उत्तर कोरिया र इरानसँग शान्ति वार्ताका लागि अपील पनि गरेको उनले बताए ।
ट्रम्पको नोमिनेशनका लागि लेखिएको पत्रमा भनिएको छ – ‘ट्रम्पले यस पुरस्कारका लागि तीनवटै योग्यताहरू पूरा गर्छन्। उनीले अरू देशहरूसँग कुनै पनि प्रकारका सशस्त्र द्वन्द्व बढाएनन् । युद्धको पहल पनि गरेनन्। ट्रम्पले मध्य पूर्वी देशहरूमा नाटो र अमेरिकी सेना घटाएका छन्। ३९ बर्षदेखि अमेरिकी राष्ट्रपतिहरुले या त अमेरिकालाई युद्धको अवस्थामा लगिरहेका थिए, या त अमेरिकालाई अन्तर्राष्ट्रिय सशस्त्र विवादमा अल्झाएका थिए । ट्रम्पले यसलाई समाप्त पारेका छन् ।’
नोबेल शान्ति पुरस्कारको लागि कसैलाई मनोनयन गर्न योग्य व्यक्ति एक लोकप्रिय व्यक्तित्व, राष्ट्रिय नेता, प्राध्यापक र पुराना विजेता हुनुपर्छ । यस पुरस्कारका लागि प्रत्येक वर्ष फेब्रुअरी र मार्चमा चयन नामांकनमा परेकाहरुको छनौट गरिन्छ । गरिन्छ।
२०२१ नोबेल शान्ति पुरस्कार अर्को वर्ष अक्टोबरमा घोषणा गरिनेछ। यस बर्षमा अर्थात् २०२० को नोबेल शान्ति पुरस्कारका लागि ३१८ नोमिनेशन गरिएको थियो । यी मध्ये २११ व्यक्ति र १०७ संगठनहरू रहेका थिए ।
कुनै पनि सांसदले कसैलाई नोबेल शान्ति पुरस्कारका लागि मनोनयन गर्न सक्दछन्। नोबेल शान्ति पुरस्कारका लागि उम्मेदवारहरूलाई विचार र पुरस्कृत गर्ने प्रक्रिया नर्वेमा पूरा हुन्छ । जबकि अन्य नोबेल पुरस्कारहरू छिमेकी देश स्वीडेनमा प्रदान गरिन्छ । नोमिनेशनमा परेकाहरुको नाम १ फेब्रुअरीसम्म नर्वेको नोबेल समिति समक्ष पठाइनेछ ।