Follow @khasokhasmag

संसदको कारवाही आजदेखि सुरु, दोश्रो चरणको चेकविना राहत प्याकेज ल्याउने रिपब्लिकन तयारी


प्रकाशित मिति : भाद्र २३, २०७७ मंगलबार

अमेरिकी संसदमा आजदेखि सिनेटको कारवाही सुरु भएको छ । कोरोनाको राहत प्याकेजमा कुनै सहमति नभएपछि संसद छुट्टीमा रहेको थियो । आज दिउसोदेखि सिनेटको बैठकबस्ने बताइएपनि प्रतिनिधिसभाभने सेप्टेम्बर १४ देखिमात्र सुचारु हुनेछ ।

संसदको छुट्टी भएको बेलामा केही वार्ताहरु भएपनि अहिलेसम्म सहमति भने कायम हुन सकेको छैन । सिनेटमा डेमोक्रेटिक नेता चक शुमरले १२ सय डलरको दोश्रो चरणको चेक र काम गुमाएकाहरुलाई साप्ताहिक ६ सय डलरको व्यवस्थासहित हाउसबाट पारित राहत प्याकेज सिनेटबाट पनि पारित गर्न आब्हान गरेका छन् ।

३ दशमलव ४ ट्रिलियन डलरको हिरोज एक्ट हाउसबाट गत मे महिनामा नै पारित भएको थियो । तर यो सिनेटबाट अस्वीकृत भएको छ । डेमोक्र्याट्सहरु एक ट्रिलियन डलर कम गरेर २ दशमलव २ ट्रिलियनमा झर्न तयार रहेका छन् तर ह्वाइटहाउस भने १ ट्रिलियन डलरब बढेर २ ट्रिलियनमा जान तयार भएको छैन । यो गाँठो एकमहिनादेखि फुक्न सकेको छैन ।

ह्वाइट हाउस । फोटो : किशोर पन्थी

सिनेटबाट रिपब्लिकनहरुले ५ सय बिलियनको एउटा सानो राहत बिल ल्याउने तयारी गरेका छन् । यो उनीहरुले नै ल्याएको १ ट्रिलियन डलरको हिल्स एक्टको संसोधित भर्सन हो । यसमा दोश्रो चरणको १२ सय डलरको चेकलाई भने नसमेटिने जनाइएको छ । यद्यपी दोश्रो चरणको राहत चेकबारे डेमोक्र्याट्सहरु र ह्वाइटहाउसदेखि रिपब्लिकनसम्म सहमत देखिएका थिए ।

५ सय बिलियनको प्याकेजमा बेरोजगारी विमा रकम पाइरहेकाहरुलाई अतिरिक्त सुविधा, पीपीपी र साना विजनेशलाई ऋण, शिक्षालाई फण्ड, कोरोना परीक्षण र भ्याक्सिनलाई फण्ड, हुलाकलाई फण्ड लगायतका विषय समेटिने जनाइएको छ । तर यो पातलो बिल पारित हुने नहुने भने कुनै ठेगान छैन ।

एकातिर अमेरिकी राष्ट्रपतिको चुनाव आउन २ महिनापनि बाँकी छैन । अर्कोतर्फ यो आर्थिक बर्ष सेप्टेम्बर ३० मा समाप्त हुँदैछ । यो अवस्थामा संसदमा कुनै पनि सहमति कायम हुन नसक्दा अमेरिकनहरु मारमा परिरहेका छन् ।

 

© 2022 KHASOKHAS®. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com