कोरोनाबिरुद्धको भ्याक्सिनले ७१ बर्ष कटेकाहरुमा समेत राम्रोसँग काम गरेको मोडेर्नाको घोषणा
आफूले बनाइरहेको कोरोनाबिरुद्धको भ्याक्सिनले बृद्धबृद्धाहरुमा समेत काम गरेको अमेरिकन बायोटेक कम्पनी मोडेर्नाले घोषणा गरेको छ । भ्याक्सिनको नतिजा ७१ बर्षभन्दा माथिका व्यक्तिमा समेत उत्साहजनक रहेको मोडेर्नाले बुधबार बताएको छ ।
५६ बर्षदेखि ७० बर्षसम्मका १० जनामा र ७१ बर्षदेखि माथिका १० जनामा मोडेर्ना भ्याक्सिनको परीक्षण गरिएको थियो । सबै सहभागीहरुले २८ दिनको फरकमा एकसय माइक्रोग्राम डोजका दुई भ्याक्सिन लगाएका थिए ।
सहभागीहरुमा भ्याक्सिनले भाइरसबिरुद्धको इम्युन र टी सेल उत्पादनका लागि आवश्यक पर्ने तटस्थ एन्टीबडी उत्पादन गरेको जनाइएको छ । कोरोनासंक्रमणबाट निको भएकाहरुको तुलनामा भ्याक्सिन दिइएकाहरुमा एन्टीबडी उच्चमात्रामा उत्पादन भएको मोडेर्नाले जनाएको छ ।
भ्याक्सिन लगाउँदा कुनै दुखाई नहुने कम्पनीले जनाएको छ । कतिपयमा टाउको दुख्ने लगायतका सामान्य लक्षणहरु देखिएपनि दुईदिनमा आफै निको भएको पाइएको छ ।
मोडेर्नाले उत्पादन गरिरहेको भ्याक्सिनको तेश्रो चरणको परीक्षण भइरहेको छ । यो भ्याक्सिन विश्वमा उत्पादन भइरहेका कैयन भ्याक्सिन मध्येको एक हो । विश्वभर दुईदर्जनबढी भ्याक्सिनहरु क्लीनिकल परीक्षणका क्रममा छन् ।
अमेरिकी अधिकारीहरुले भ्याक्सिन नबन्दासम्म अवस्था सामान्य नहुने बताउँदै आएका छन् । बुधबारको मोडेर्नाको घोषणाले डिसेम्बरको अन्त्यसम्म वा सन् २०२१ को सुरुसम्ममा भ्याक्सिन आउनेमा थप आशा जगाएको छ ।
मोडेर्नाले सस्तो मूल्य अन्तरगत ३२ डलरदेखि ३७ डलरसम्ममा ग्राहकलाई भ्याक्सिन बेच्ने बताइएको छ । तर सरकारको अभियान अवधिभर भ्याक्सिन निशुल्क समेत लगाउनसकिने जनाइएको छ ।
