‘अष्ट्रेलियामा अहिले काम खोज्नु भनेको भित्तामा टाउको ठोक्नु जस्तो ‘
प्रकाशित मिति : श्रावण १५, २०७७ बिहीबार
अष्ट्रेलियामा अहिले कोरोना भाइरस महामारीका कारण अर्थतन्त्रमा प्रभाव परिरहेको छ। जसको प्रत्यक्ष प्रभाव रोजगारीमा परिरहेको छ।
हाल धेरैले रोजगारी गुमाइरहेको अवस्था छ भने काम गरिरहेकाहरुले समेत कम तलब पाइरहेको अवस्था छ। यसै प्रसङ्गमा नाइनन्युजले मेलबर्नमा बस्दै आएकी ३७ वर्षिया महिलाको अहिलेको अनुभव प्रकाशन गरेको छ।
ती महिलाले भनेकी छिन् , ” मैले इभेन्ट म्यानेजरको रुपमा काम गर्दै आएकी थिएँ। मैले १५ वर्ष अगाडी उक्त काम थालेकी हूँ। तर कोरोना संक्रमण फैलिएयता इभेन्टहरु बन्द भएपछि मेरो आम्दानीको स्रोत पनि हरायो। त्यसयता काम खोज्दै मैले करिब एक सय जति जागिरमा एप्लाई गरें। तर मैले काम पाउन सकिन” ।
उनले एप्लाई गरेको ठाउँमा अहिले आफू जस्तै काम गुमाएका हजारौंले एप्लाई गर्ने हुँदा काम पाउन असम्भव जस्तै भएको बताएकी छिन्। उनले भनेकी छिन् , ” यहाँ अहिले काम खोज्नु भनेको भित्तामा टाउको ठोक्नु जस्तै हो “।
पछिल्लो तथ्यांक अनुसार, गत मार्च १४ देखि जुलाई ११ सम्ममा पे रोल जबमा ५.६ प्रतिशतले गिरावट आएको छ। सबैभन्दा बढी हस्पिटालिटी क्षेत्रलाई असर परेको बताइएको छ। हस्पिटालिटी क्षेत्रमा १८.१ प्रतिशतले गिरावट आएको छ।