भींडभाड गर्न नछाडे न्युयोर्क सिटी पुन शटडाउन गर्ने गभर्नर कुमोको चेतावनी
प्रकाशित मिति : श्रावण ५, २०७७ सोमबार
न्युयोर्क सिटी चौथो चरणमा खुल्दै गर्दा सडकहरुमा अनावश्यक भींडभाड र भोजहरु बढ्न थालेपछि गभर्नर एन्ड्रयु कुमोले भींडभाड गर्न नछाडे न्युयोर्क सिटी पुन शटडाउन गर्ने चेतावनी दिएका छन् । बार र रेष्टुरेण्टहरुले ठूला ठूला भींडभाडहरु जम्मा हुन अनुमति दिन थालेपछि कुमोले बार र रेष्टुरेण्टहरु शटडाउन गर्ने चेतावनी दिएका हुन् ।
न्युयोर्कमा केहदिन यता स्ट्रीट पार्टीहरुमा भींडभाड जम्मा भइरहेका खबरहरु आएका छन् । त्यस्ता जमघटहरुमा सामाजिक दुरीको नियम पालना गरिएको छैन भने मास्कको पनि प्रयोग गरिएको छैन । मान्छेहरुले लापरवाही गर्न थालेपछि गभर्नर कुमोले शटडाउनको चेतावनी दिएका हुन् ।
क्वीन्सको अष्टोरिया र म्यानहटनका लोअर इस्ट साइडमा त्यस्ता जमघटहरु भएपछि कुमोले त्यसको बिरुद्ध बोलेका हुन् । कुमोले भनेका छन् – ‘मुर्ख नबनौं । उनीहरुले जे गरिरहेका छन्, त्यो आफ्नो र अरुका लागि पनि लापरवाहीपूर्ण रहेको छ । यस्तो लापरवाही जारी रहेको छ । र अझ खराब बन्दैछ । त्यसैले यो तुरुन्तै रोकिनुपर्छ ।’
अवस्थामा एकदम छिटो र नाटकीय रुपमा सुधार नआएमा बार र रेष्टुरेण्टहरु पुन बन्द गर्ने कुमोले बताएका छन् । कुमोले न्युयोर्क प्रहरी र स्थानीय निकायहरुलाई नियम कार्यान्वयन गराउन माग गरेका छन् ।
आजदेखि न्युयोर्क सिटी चौथो चरणमा खुलेको छ । न्युयोर्कमा कोरोनाको संक्रमण अहिले निकै कम रहेको छ भने आइतबार ८ सय भन्दा कम अस्पतालमा भर्ना गरिएको छ । आइतबार कोरोना संक्रमणबाट न्युयोर्क राज्यभर ११ जनाको ज्यान गएको थियो ।