दैलेखमा निषेधाज्ञा जारी
प्रकाशित मिति : जेष्ठ २३, २०७७ शुक्रबार
जिल्ला प्रशासन कार्यालय दैलेखले निषेधाज्ञा जारी गरेको छ । २३ जेठ साझ ६ बजेदेखि लागू हुने गरी अर्को आदेश नभए सम्मका लागि निषेधाज्ञा जारी गरेको हो ।
दैलेख जिल्लामा हालसमम २ सय १८ जनामा कोरोना संक्रमण देखिएको र एक जनाको मृत्यु भएको छ । कोरोना भाइरसको सम्भावित उच्च संक्रमण जोखिमको अवस्था मध्यनजर गर्दै निषेधाज्ञा जारी गरिएको सहायक प्रमुख जिल्ला अधिकारी इन्द्रबहादुर क्षेत्रीलेले बताउनु भयो ।
कोरोना भाइरस संक्रमण रोकथाम तथा न्यूनीकरण र फैलिन नदिनका लागि औषधि, स्वास्थ्य सेवा बाहेक अरु कुनै पनि व्यक्ति घरबाट बाहिर ननिस्किन निषेधाज्ञा जारी पत्रमा उल्लेख गरिएको छ ।
अनुमति प्राप्त सवारी साधन, स्वास्थ्यकर्मी, सुरक्षा निकायले प्रयोग गर्ने बाहेक सवै प्रकारका सार्वजनिक वा निजी यात्रुवाहक सवारी साधन सञ्चालनमा पूर्ण रुपमा रोक लगाइएको छ । जिल्लाभित्रका औषधि पसल बाहेक अन्य पसल पूर्णरुपमा बन्द गर्न जारी निषेधाज्ञा पत्रमा उल्लेख छ ।
उक्त आदेशको उल्लघंन गर्ने जोकोही व्यक्तिलाई प्रचलित कानून संक्रमण रोग ऐन २०२० को दफा २ (२) र स्थानीय प्रशासन ऐन २०२८ को दफा ६ (३) बमोजिम कारवाही गरिनेसमेत चेतावनी प्रशासनले दिएको छ ।