झापाको कचनकवल क्वारेन्टीमा रहेका २५ प्रतिशतमा कोरोना संक्रमण पुष्टि
प्रकाशित मिति : जेष्ठ १६, २०७७ शुक्रबार
झापाको कचनकवल गाँउपालिकामा मात्र कोरोना सङ्क्रमितको सङ्ख्या एक सय पुगेको छ । यो प्रदेशमा नै एउटै स्थानीय तहमा सबैभन्दा बढी कोरोना देखिएको गाँउपालिका हो । कोरोना पोजेटिभ देखिएका सबै भारतबाट फर्केका र क्वारेन्टाइनमा रहेकाहरू हुन् ।
कचनकवल पालिकाको पथरिया मावि, लक्ष्मीप्रसाद देवकोटा मावि, जानकी आधारभूत विद्यालय, महेन्द्र रत्न मावि, बुद्ध आधारभूत विद्यालय र केचना माविमा क्वारेन्टिन भएका छन् । यहाँ ४ सयभन्दा बढिलाई राखिएको छ । क्वारेन्टाइनमा रहेका २५ प्रतिशतभन्दा बढिलाई कोरोना सङ्क्रमण पुष्टि भएको छ, यहाँका एक स्वास्थ्यकर्मीले भन्नुभयो ।
शुक्रबार अपरान्ह थप २७ जनामा कोरोना सङ्क्रमण पुष्टि भएसंगै यहाँ कोरोना सङ्क्रमण हुनेको सङ्ख्याको एक सय पुगेपछि क्वारेन्टाइनको बसो बासप्रति पनि आवाज उठ्न थालेको छ । क्वारेन्टाइन अव्यवस्थित हुँदा र स्वाब परीक्षण पर्याप्त नभएका कारण क्वारेन्टाइनमा नै महामारीको रुपमा लिएको जनप्रतिनिधिहरूले बताएकाछन् ।
यसै क्षेत्रबाट प्रतिनिधित्व गर्ने प्रदेश सभा सदस्य बसन्त बाँनियाले प्रदेश सभामा नै यहाँका क्वारेन्टाइन अब्यवस्थित हुँदा ठुलो महामारी हुने अवस्था आएको र यहाँ स्वास्थ्यकर्मी समेत अभाव रहेको आवाज विहिबार उठाउनु भएको थियो । त्यस लगत्तै प्रदेश सरकारले क्वारेन्टाइन ब्यवस्थित गर्न १५ लाख रुपिया उपलब्ध गराउने निर्णय गरेको थियो ।
क्वारेन्टाइनको अवस्था नै महामारी फैलने रहेको छ र यहाँ अहिले पनि क्वारेन्टाइनमा रहेका एक सयभन्दा बढिको स्वाब परीक्षण भएको छैन, प्रदेश सभा सदस्य बाँनियाले भन्नुभयो । भारतको दिल्लि, मुम्बइ लगायतका ठाँउहरूबाट घर फर्केकाहरूलाई गाँउपालिकाले क्वारेन्टाइनमा राखेको थियो ।
कचनकवल गाँउपालिकामा क्वारेन्टाइनभन्दा बाहिर समुदायमा भने कोरोना सङ्क्रमित भेटिएका छैनन् । गाँउपालिका अध्यक्ष अन्जार आलमका अनुसार आफुहरूले भारतबाट आउनेलाई समुदायमा घुलमिल हुनुभन्दा अघि नै क्वारेन्टाइनमा राख्दा क्वारेन्टाइनभन्दा बाहिर कोरोना फैलन पाएको छैन ।
जिल्ला स्तरीय कोरोना रोकथाम तथा समन्वय समितिका संयोजक समेत रहनु भएका जिल्ला समन्वय समिति झापाका संयोजक सोमनाथ पोर्तेलका अनुसार क्वारेन्टाइनलाई ब्यवस्थित गर्नका लागि र भित्र सामाजिक दुरी पालना गर्ने अवस्था सिर्जना गर्नका लागि प्रयास भईरहेको छ । पछिल्लो विवरण अनुसार झापामा कोरोना सङ्क्रमितको सङ्ख्या १०७ पुगेको छ । गोरखापत्र