अमेरिकी भिसाका नाममा हुने ठगीबाट बच्न अमेरिकी दूतावास काठमाडौंका तीन अनुरोध
प्रकाशित मिति : फाल्गुन २२, २०७६ बिहीबार
अमेरिकी भिसाका नाममा हुने ठगीबाट बच्न अमेरिकी दूतावास काठमाडौंले तीन अनुरोध गरेको छ । अमेरिकी दूतावासमा काम गर्ने बताउँदै भिसा दिलाइदिने शर्तमा ठगी गर्ने व्यक्ति काठमाडौंबाट पक्राउ परेको केही दिनपछि दूतावासले सामाजिक सञ्जालमाफर्त यस्तो अनुरोध जारी गरेको हो ।
अमेरिकी भिसा दूतावासबाट मात्रै पाउन सकिने र मुख्यतया अमेरिकी कन्सुलर अफिसरसँगको प्रत्यक्ष अन्तर्वातापछि मात्रै पाउन सकिने दूतावासले स्पष्ट पारेको छ । त्यस्तै अमेरिकी भिसासम्बन्धी सबै कारोवारहरू तोकिएको नेपाल इन्भेस्टमेन्ट बैंक वा दूतावासमा मात्रै गर्नुपर्ने र अमेरिकी दूतावासका कर्मचारीहरूले तपाईंलाई कहिल्यै पनि दूतावासबाहिर रकम माग गर्ने अथवा व्यक्तिगत खातामा रकम हालिदिन आग्रह नगर्ने स्पष्ट पारिएको छ ।
त्यस्तै कसैले अनलाइन या व्यक्तिगत रूपमा तोकिएको बाहेक अन्य माध्यमबाट भिसाको नाममा रकम माग गर्ने या प्रलोभन दिने गरेमा स्थानीय प्रशासनलाई जानकारी गराउन समेत अनुरोध गरिएको छ । अमेरिका जाने भ्रमण या भिसा प्रयोजनका विभिन्न जानकारीका लागि अमेरिकी सरकारको आधिकारिक वेवसाइट हेर्न सकिन्छ ।
अमेरिकाको कामदार भिसा पठाउने नाममा ठगहरु सकृय
अमेरिकाको कामदार भिसा पठाउने नाममा ठगहरु सकृय हुने गरेका छन् । ठगहरुले निश्चित रकम माग्दै कामदार भिसा दिलाइदिने प्रतिबद्धता जनाउने गरेका छन् । यस्ता ठगहरुबाट बच्न न्युयोर्क निवासी कानुन व्यवसायी केशवराज सेडाईले केही टिप्सहरु समेत दिनुभएको छ ।
खासगरी पैसामा माग्ने कम्पनी र दलालबाट सावधान हुन उहाँले सचेत गराउनुभएको छ । अमेरिकन कम्पनीहरुले जागिरको अफर गर्दा उक्त कम्पनीको पृष्ठभूमि इन्टरनेटमा चेक गर्न उहाँले सुझाव दिनुभएको छ । साथै गुगल रिभ्यु पनि हेर्न सुझाव दिनुभएको छ ।
यदि कम्पनी सही छ भने अमेरिकी कानुन अनुशार भिसा आवेदन दिइने व्यक्तिका लागि कुनै शुल्क नलिने उहाँले जानकारी दिनुभयो । यदि कम्पनीले पैसा मागेको खण्डमा आफू त्यसबाट टाढै रहन उहाँले सुझाव दिनुभएको छ ।