न्युयोर्कमा गाडीको ठक्करबाट ज्यान गुमाएका नेपाली बालकको शनिबार अन्त्येष्टी गरिने
प्रकाशित मिति : पुस २५, २०७६ शुक्रबार
मंगलबार विहान न्युयोर्कको कोरोनामा फोहोर फ्याक्ने सरकारी गाडीको ठक्करबाट ज्यान गुमाएका १० बर्षका बालक श्री पन्थीको शनिबार अन्त्येष्टी गरिने भएको छ । शनिबार दिउसो साढे १ बजे फ्रेस पाउण्ड सिमेट्रीमा उनको अन्त्येष्टी गरिने भएको छ ।
अन्तिम श्रद्धाञ्जलीका लागि उपस्थीत हुन चाहनेहरु विहान ११ बजे कोप्पोला मिग्लीओरे इन्क फ्युनेरल होममा पुग्न सक्ने जनाइएको छ । यो फ्युनेरल होम कोरोनाको १०४ स्ट्रीटको ४९०१ मा अवस्थीत छ ।
सामाजिक व्यक्तित्व पुरुषोत्तम पन्थी र मिना पौड्याल पन्थीका छोरा श्री पन्थीको मंगलबार विहान ५७ एभिन्यु कोरोनामा लेफ्राक सिटी अपार्टमेन्ट अगाडी फोहोर फ्याक्ने गाडीको ठक्करबाट निधन भएको थियो । ठक्कर लगत्तै स्थानीय अस्पतालमा लगिएकोमा अस्पतालले मृत घोषणा गरेको थियो ।
विभिन्न अतिरिक्त कृयाकलापमा रुची राख्ने श्री पन्थी बालकलाकार समेत थिए । उनले विभिन्न प्रतियोगिताहरुमा भाग लिनुका साथै पुरस्कारहरु समेत जितेका थिए । उनका पिता पुरुषोत्तम पन्थी केहीबर्ष अगाडि अमेरिका आएका थिए भने त्यसको केही बषएपछि स्वर्गीय श्री पन्थी आमा र दाजुसहित बुबासँग बस्न अमेरिका आएका थिए ।