दुई कलाकारको निधनप्रति प्रधानमन्त्रीद्वारा श्रद्धाञ्जलि व्यक्त
प्रकाशित मिति : मंसिर ३०, २०७६ सोमबार
प्रधानमन्त्री केपी शर्मा ओलीले नेपाल चलचित्र विकास बोर्डका अध्यक्ष केशव भट्टराई र कलाकार दीपक क्षेत्रीको निधनप्रति श्रद्धाञ्जलि व्यक्त गर्दै मुलुकले प्रतिभावान् दुई कलाकार गुमाएको जनाउनुभएको छ ।
बितेका दुई दिनमा हामीले प्रतिभावान् दुई कलाकार, केशव भट्टराई र दीपक क्षत्रीलाई गुमायौं । उहाँहरुको कला सधैं हाम्रो स्मृतिमा रहनेछ । हार्दिक श्रद्धाञ्जलि ! शोकाकुल आफन्त र परिवारजनमा गहिरो समवेदना व्यक्त गर्दछु । pic.twitter.com/OWzdHG54Mt
— K P Sharma Oli (@kpsharmaoli) December 16, 2019
प्रधानमन्त्री ओलीले आज ट्विट गर्दै भन्नुभएको छ, “गएको दुई दिनमा हामीले दुई प्रतिभावान् गुमायौँ । उहाँहरुको कला सधैँ हाम्रो स्मृतिमा रहनेछ ।” प्रधानमन्त्री ओलीले दिवङ्गत परिवारलाई हार्दिक समवेदना व्यक्त गर्नुभएको छ । अध्यक्ष भट्टराईको गएराति र कलाकार क्षेत्रीको दुई दिनअघि निधन भएको थियो ।
चलचित्र विकास बोर्ड अध्यक्ष केशव भट्टराईको आकस्मिक निधन भएको थियो । आइतबार राती १० बजे चावहिलको ओम अस्पतालमा निधन भएको हो । साँझसम्म सिंहदरबारस्थित सञ्चारमन्त्रायलमा रहेका भट्टराईको मुटुमा केही समस्या देखिएपछि अस्पताल लगिएको थियो । तर, अस्पतालमा पुग्दासम्म नै निधन भइसकेको अस्पतालले बताएको छ ।
चिनो मार्फत अभिनयमा प्रवेश गरेका भट्टराईले आधा दर्जनभन्दा बढी फिल्म निर्माण गरेका थिए । आफ्नो मान्छे, पाहुना, देवरबाबु, सो सिम्पल, छोडीगए पाप लाग्ला,यात्रा उनले निर्माण गरेका चर्चित फिल्म हुन् । यि मध्ये पनि आफ्नो मान्छे नेपाली सिनेमाको सर्वाधिक हिट फिल्ममध्ये एक मानिन्छ ।
त्यस्तै लामो समयदेखि नेपाली चलचित्रमा सक्रीय रहेका पुराना अभिनेता दीपक क्षेत्री डिल्ली बजारस्थित आफ्नै निवासमा सुतेकै अवस्थामा मृत भेटिएका थिए ।
उनी कोठामा भित्रबाट चुकुल लगाएको अवस्थामा शनिबार दिउँसो मृत भेटिएका थिए । लामो समय पर्दाबाहिर रहेका ५८ वर्षीय क्षेत्री पछिल्लो पटक सुपरहिट फिल्म ‘छ माया छपक्कै’ मा देखिएका थिए । कलाकार क्षेत्रीले सयभन्दा नेपाली चलचित्रमा अभिनय गरेका छन् । उनी चलचित्रमा खलनायक र चरित्र अभिनेताको रुपमा अभिनय गर्दथे ।
‘जीवनदान’, ‘सिमाना’, ‘सेतो सूर्य’, ‘राज्जा रानी’, ‘मसान’, ‘झोला’ लगायतका सयौं फिल्ममा कलाकार क्षेत्रीले अभियन गरेका छन् ।