बाढीपछि नेपालका लागि अमेरिकाद्वारा थप १० लाख डलर सहायता स्वीकृत, कुल सहायता ५० लाख डलरभन्दा बढी
डीएनए परीक्षणका लागि रगतको नमुना संकलन केन्द्र। नेपाल प्रहरीले बाढीपहिरोमा मृत्यु भएका तथा बेपत्ता व्यक्तिको पहिचानका लागि डीएनए नमुना संकलन गरिरहेको छ।
अमेरिकाले हालैको बाढीमा मृत्यु भएकाहरूको पहिचान गर्न नेपाल प्रहरीलाई सहयोग गर्ने उद्देश्यले थप १० लाख डलर सहायता स्वीकृत गरेको छ। यससँगै बाढीपछि अमेरिकाले नेपाललाई उपलब्ध गराएको मानवीय, स्वास्थ्य तथा फरेन्सिक सहयोगको कुल रकम ५० लाख डलरभन्दा बढी पुगेको अमेरिकी विदेश मन्त्रालयले जनाएको छ।
अमेरिकी विदेश मन्त्रालयको अन्तर्राष्ट्रिय लागुऔषध तथा कानुन कार्यान्वयन मामिला ब्युरोमार्फत स्वीकृत नयाँ रकमबाट नेपाल प्रहरीलाई फरेन्सिक सहयोग उपलब्ध गराइनेछ। यसअन्तर्गत डीएनए परीक्षणका किटसहित विपद्का क्रममा मृत्यु भएकाहरूको पहिचानका लागि आवश्यक प्राथमिक सामग्री उपलब्ध गराइने मन्त्रालयले जनाएको छ।
मृतकको पहिचानमा सहयोग गर्न अमेरिकी संघीय जाँच ब्युरोका फरेन्सिक विशेषज्ञहरूले नेपाल प्रहरीसँग सहकार्य गरिरहेका छन्। उनीहरूले विपद्मा मृत्यु भएकाहरूको पहिचानसम्बन्धी विशेष प्राविधिक सहयोग उपलब्ध गराइरहेको विदेश मन्त्रालयले जनाएको छ।
नयाँ सहायता अमेरिकाको व्यापक बाढी प्रतिकार्यको हिस्सा हो। यसअन्तर्गत विश्व खाद्य कार्यक्रममार्फत ३० लाख डलर बराबरको खाद्य तथा ढुवानी सहयोग पनि समावेश छ। उक्त सहयोगबाट बाढी प्रभावित १० हजार परिवारलाई तीन महिनासम्म आपत्कालीन खाद्य सामग्री उपलब्ध गराउने अपेक्षा गरिएको छ। साथै, हवाई तथा स्थलमार्गबाट दुर्गम तथा सम्पर्कविहीन समुदायसम्म सहायता पुर्याएर आपूर्ति व्यवस्थामा देखिएका अवरोध हटाउन सहयोग गरिनेछ।
अमेरिकाले क्याथोलिक रिलिफ सर्भिसेसमार्फत खाद्य सामग्री, आश्रय, खानेपानी, सरसफाइ, स्वच्छता, संरक्षण तथा नगद सहयोगका लागि थप ६ लाख ८५ हजार डलर उपलब्ध गराएको छ। यस सहयोगअन्तर्गत आश्रय तथा खाद्य सामग्री, कम्बल, प्लास्टिकका त्रिपाल, पाल, सौर्य बत्ती र आवश्यक सामग्रीसहितका प्याकेज उपलब्ध गराइएका छन्। क्याथोलिक रिलिफ सर्भिसेसले बाढी प्रभावित बालबालिकाका लागि बालमैत्री केन्द्रहरू पनि सञ्चालन गरिरहेको विदेश मन्त्रालयले जनाएको छ।
स्वास्थ्य, पोषण, खानेपानी, सरसफाइ तथा स्वच्छतासम्बन्धी कार्यक्रमका लागि जेपिगो, एफएचआई ३६० र युनिसेफमार्फत थप ३ लाख ६५ हजार डलर छुट्याइएको छ।
अमेरिकी सेनाले नेपाल नेतृत्वको खोज, उद्धार तथा पुनःस्थापना अभियानमा सहयोग गर्न विपद्मा मृत्यु भएकाहरूको शव तथा अवशेष उद्धारका लागि प्रयोग हुने ५ हजार विशेष सामग्री, ५ सय प्राथमिक उपचार सामग्री, स्ट्रेचर र अगाडिबाट माटो तथा भग्नावशेष हटाउने मेसिन नेपाल पठाएको छ।
त्यस्तै, संकटपछिका मानवीय आवश्यकता सम्बोधन गर्न सहयोग पुर्याउने उद्देश्यले अमेरिकी सेनाको चार सदस्यीय नागरिक मामिला टोली पनि नेपालमा रहेको छ।
“नेपालमा आएको बाढीबाट प्रभावित सबै व्यक्ति र उनीहरूका परिवारप्रति संयुक्त राज्य अमेरिका आफ्नो गहिरो समवेदना व्यक्त गर्दछ,” अमेरिकी विदेश मन्त्रालयले भनेको छ।
परिस्थिति परिवर्तन हुँदै जाँदा नेपाल सरकार र स्थानीय साझेदारहरूसँग समन्वय गर्दै जाने पनि मन्त्रालयले जनाएको छ।
नेपालको आवश्यकता हेरेर थप सहायता उपलब्ध गराउन अमेरिका तयार रहेको विदेश मन्त्रालयले जनाएको छ।