न्युयोर्क सिटीद्वारा आप्रवासी कानुनी सहायता हटलाइन प्रवर्द्धन गर्न अभियान सुरु
न्युयोर्कको ज्याक्सनहाइट्स मिनी नेपालका रुपमा समेत परिचित छ।
न्युयोर्क सिटीको मेयर कार्यालयअन्तर्गतको आप्रवासी मामिला कार्यालय (एमओआईए) ले आप्रवासीहरूलाई निःशुल्क र गोप्य कानुनी सहायता उपलब्ध गराउने आफ्नो कानुनी सहायता हटलाइन बारे जानकारी फैलाउन एकमहिने विज्ञापन अभियान सुरु गरेको छ।
कुल ३ लाख डलरको यो अभियान २०२६ को आर्थिक वर्षमा न्युयोर्क सिटी काउन्सिलले उपलब्ध गराएको रकमबाट सञ्चालन गरिएको हो। अभियानअन्तर्गत छापा, रेडियो र डिजिटल विज्ञापनमार्फत १७ भाषामा सूचना फैलाइनेछ, जसमा नेपाली, स्पेनी, चिनियाँ, रुसी, पुलार, तिब्बती, टागालोग, किच्वा, सोनिन्के, अरबी, पञ्जाबी, फ्रेन्च, हैटियन क्रियोल, उर्दू, वोलोफ र मिन नान समावेश छन्।
मेयर जोहरान ममदानी ले न्युयोर्क बहुभाषिक सहर भएको उल्लेख गर्दै, आप्रवासीहरूको भाषा र विश्वासअनुसार कानुनी सहयोग उपलब्ध गराउनु सहरको दायित्व भएको बताए।
“न्युयोर्क सिटीमा सयौं भाषाहरू बोलिन्छन्, र ती सबै यहाँका हुन्,” उनले भने। “हाम्रो आव्रजन कानुनी सहायता हटलाइनले आप्रवासीहरूको आव्रजन स्थिति जस्तोसुकै भए पनि उनीहरूलाई आफूले बोल्ने र विश्वास गर्ने भाषामै निःशुल्क, गोप्य कानुनी सहायता प्रदान गर्छ।”
एमओआईएका आयुक्त फाइजा एन. अली ले यो अभियान आप्रवासी समुदायका लागि चुनौतीपूर्ण र बदलिँदो आव्रजन प्रवर्तन अवस्थाबीच सुरु गरिएको बताइन्। उनका अनुसार यो अभियानले ५ वटै बरोमा रहेका आप्रवासी न्युयोर्कवासीसम्म कानुनी स्रोत र सहायता पुर्याउने लक्ष्य राखेको छ।
छापा र रेडियो विज्ञापन समुदाय तथा जातीय सञ्चारमाध्यमका पत्रपत्रिका र रेडियो स्टेशनहरूमा प्रसारण गरिनेछ। डिजिटल विज्ञापन भने सामाजिक सञ्जाललगायतका माध्यममा देखाइनेछ। साथै, एमओआईएको पहुँच टोलीले अगस्टभरि सहरका विभिन्न समुदायमा बहुभाषिक पोस्टरहरू पनि वितरण गर्नेछ।
जसको आव्रजन स्थिति जस्तोसुकै भए पनि, न्युयोर्कवासीहरूले १-८००-३५४-०३६५ मा रहेको निःशुल्क र गोप्य हटलाइनमा कल गर्न सक्छन् वा ३११ मा फोन गरेर “इमिग्रेसन लिगल” भन्न सक्छन्।
यो हटलाइन सोमबार र बुधबार बिहान ९ बजेदेखि साँझ ८ बजेसम्म, मंगलबार, बिहीबार र शुक्रबार बिहान ९ बजेदेखि साँझ ६ बजेसम्म तथा प्रत्येक महिनाको अन्तिम शनिबार बिहान ९ बजेदेखि दिउँसो ५ बजेसम्म उपलब्ध रहनेछ।
उपप्रमुख सचेतक एल्सी एन्कार्नासियोन ले डर र जानकारीको अभावका कारण धेरै आप्रवासी परिवारहरूले आवश्यक कानुनी सहायता नलिएको भन्दै हटलाइनलाई महत्त्वपूर्ण कदम बताइन्।
“धेरै आप्रवासी परिवारहरूका लागि डर र जानकारीको अभावले उनीहरूलाई आवश्यक कानुनी सहायता खोज्नबाट रोकेको छ,” उनले भनिन्। “एमओआईएको नयाँ हटलाइन यो वास्तविकता बदल्नका लागि महत्त्वपूर्ण कदम हो।”
काउन्सिल सदस्य एलेक्सा एभिलेस ले पनि अभियानको प्रशंसा गर्दै न्युयोर्क सिटीले आप्रवासीहरूका लागि कानुनी सहायता कार्यक्रमहरूमा थप लगानी गर्नुपर्ने बताइन्।
“न्युयोर्क सिटीले न्युयोर्कवासीहरूले बोल्ने भाषामै निःशुल्क कानुनी सहायता उपलब्ध गराउन पाउँदा गर्व गर्छ,” उनले भनिन्। “हामी न्युयोर्कवासीहरूलाई आप्रवासी मामिला कार्यालयको नयाँ हटलाइन प्रयोग गरेर आफूलाई आवश्यक गोप्य र सुरक्षित सहायता लिन आग्रह गर्छौं।”