अमेरिकामा त्यो चर्चित बहस, पूर्वप्रथम महिला जिल बाइडेनले खोलिन् रहस्य
प्रकाशित मिति : १३ जेष्ठ २०८३, बुधबार
अमेरिकाकी पूर्वप्रथम महिला जिल बाइडेनले पति जो बाइडेनलाई मस्तिष्काघात (स्ट्रोक) भएको हो कि भन्ने डर लागेको बताएकी छिन्।
सन् २०२४ को चर्चित राष्ट्रपतीय बहसका क्रममा आफ्ना पतिलाई मस्तिष्काघात भएको हो कि भनेर आफू अत्यन्तै डराएको र त्यसले आफूलाई भयभीत बनाएको उनले बताएकी हुन्। उनले भनिन्, “म अत्यन्त डराएकी थिएँ, किनभने मैले त्यसअघि वा त्यसपछि जोलाई कहिल्यै त्यस्तो अवस्थामा देखेकी थिइनँ।”
तत्कालीन राष्ट्रपति बाइडेनले सन् २०२४ को राष्ट्रपतीय चुनावी बहसमा रिपब्लिकन उम्मेदवार डोनाल्ड ट्रम्पविरुद्ध कमजोर प्रस्तुति दिएपछि डेमोक्र्याट नेताहरूबाट उम्मेदवारी त्याग्न तीव्र दबाबको सामना गरेका थिए। त्यसपछि उनले चुनावी प्रतिस्पर्धाबाट बाहिरिने घोषणा गर्दै तत्कालीन उपराष्ट्रपति कमला ह्यारिसलाई समर्थन गरेका थिए।
जिल बाइडेनले आफ्ना पतिको लामो राजनीतिक यात्रामा निरन्तर साथ दिएकी छिन्। डेलावेयर राज्यका सिनेटरदेखि राष्ट्रपति बन्नेसम्मको यात्रामा उनी जो बाइडेनकी निकट सल्लाहकारमध्ये एक मानिन्थिन्। सन् २०२४ को चुनावी प्रतिस्पर्धाबाट बाहिरिन पनि उनले नै प्रोत्साहन दिएको बताइन्छ।
जुन २०२४ मा भएको बहसपछि डेमोक्र्याट नेताहरूले बाइडेनको कमजोर प्रस्तुतिप्रति चिन्ता व्यक्त गरेका थिए। बहसका क्रममा उनको स्वर कमजोर सुनिएको थियो भने केही समय उनी आफ्नो भनाइ बिर्सिएजस्तो पनि देखिएका थिए। त्यतिबेला बाइडेनको टोलीले उनी बिरामी भएकाले स्वर कमजोर भएको दाबी गरेको थियो।
बहसअघि नै ८१ वर्षीय बाइडेनको स्वास्थ्य, मानसिक सक्रियता र उमेरबारे मतदाताहरूमा चिन्ता बढिरहेको थियो। बहसपछि अमेरिकी सञ्चारमाध्यम र विश्लेषकहरूले उनको राष्ट्रपति पद सम्हाल्ने क्षमतामाथि प्रश्न उठाएका थिए।
सुरुमा बाइडेनलाई चुनावका लागि केही महिना मात्र बाँकी रहँदा उम्मेदवारबाट हटाइने सम्भावना कम मानिएको थियो। तर बहसपछि उत्तर एटलान्टिक सन्धि सङ्गठन (नेटो) को शिखर सम्मेलनका क्रममा भएका गल्तीहरू र कोरोना सङ्क्रमणपछि देखिएको कमजोर स्वास्थ्य अवस्थाले अन्ततः उनलाई उम्मेदवारी त्याग्न बाध्य बनायो।
त्यसपछि कमला ह्यारिस डेमोक्र्याटिक पार्टीकी उम्मेदवार बनेकी थिइन्। तर उनले चुनावमा ट्रम्पसँग पराजय बेहोर्नुपरेको थियो। चुनावी हारपछि ह्यारिसले आफ्नो संस्मरणमा बाइडेनको दोस्रो कार्यकालका लागि चुनाव लड्ने निर्णयलाई “लापरबाही” भन्दै आलोचना गरेकी थिइन्।