अमेरिकी नागरिकता खारेज गर्न ट्रम्प प्रशासनद्वारा भारतीय मूलका व्यक्तिसहित १२ जनाविरुद्ध मुद्दा दायर
फोटो: जेरेमी डोरोघ
अमेरिकी जस्टिस डिपार्टमेन्टले शुक्रबार विभिन्न संघीय अदालतहरूमा १२ जना अमेरिकी नागरिकहरूको नागरिकता खारेज गर्न मुद्दा दायर गरेको छ। यी व्यक्तिहरूले आप्रवासन प्रक्रियामा गम्भीर अपराधहरू र नागरिकता पाउनका लागि अयोग्य कार्यहरू लुकाएको आरोप लगाइएको छ ।
यी मुद्दाहरूमा आतंकवादलाई सामग्री समर्थन, युद्ध अपराध, नाबालिगमाथि यौन दुर्व्यवहार, जासुसी, धोका र आप्रवासन धोका सम्बन्धी आरोपहरू रहेको जस्टिस डिपार्टमेन्टले जनाएको छ। जस्टिस डिपार्टमेन्टको अफिस अफ इमिग्रेसन लिटिगेसनले यी मुद्दा दायर गरेको हो, जसमा विभिन्न जिल्लाका यूएस एटर्नी अफिसहरूको सहयोग छ ।
कार्यवाहक महान्यायाधिवक्ता टोड ब्लान्चले धोका, यौन दुर्व्यवहार वा आतंकवाद समर्थनको आरोप लागेका व्यक्तिहरूले कहिल्यै अमेरिकी नागरिकता पाउन नहुने बताएका छन्। सहायक महान्यायाधिवक्ता ब्रेट ए. सुमेटले नागरिकता प्रक्रियाको अखण्डता पुनर्स्थापना गर्न तीब्र गतिमा मुद्दा दायर गरिरहेको बताएका छन्।
यी व्यक्तिहरू इराक, कोलम्बिया, मोरक्को, सोमालिया, गाम्बिया, बोलिभिया, उज्बेकिस्तान, केन्या, भारत, चीन र नाइजेरियाका छन्। यसमा क्युबाका लागि एजेन्टको रूपमा काम गरेको अभियोगमा दोषी ठहरिएका पूर्व अमेरिकी कूटनीतिज्ञ भिक्टर म्यानुएल रोचा पनि समावेश छन् ।
आप्रवासन तथा नागरिकता ऐनअन्तर्गत अवैध रूपमा प्राप्त गरिएको वा सामग्री तथ्य लुकाएर वा जानाजानी गलत प्रतिनिधित्व गरेर प्राप्त गरिएको अगिकृत नागरिकता खोस्न सकिन्छ। जस्टिस डिपार्टमेन्टले यी आरोपहरू मात्र रहेको र अदालतले कुनै दायित्व निर्धारण गरि नसकेको उल्लेख गरेको छ ।
उदाहरणका लागि, कोलम्बियाली पूर्व पुजारी ओस्कर अल्बर्टो पेलेआजले नाबालिगमाथि यौन दुर्व्यवहारको दोष लुकाएको आरोप छ भने खालिद ओउज्जानीले प्राकृतिकीकरण अघि र पछि अल-कायदासँगको सम्बन्ध लुकाएको दाबी गरिएको छ।
अन्य व्यक्तिमा अली युसिफ अहमद अल-नौरी (इराक), सलाह उस्मान अहमद (सोमालिया), बाबौकार मबोब (गाम्बिया), केभिन रोबिन सुआरेज (बोलिभिया), अब्दुवोसित रजिकोभ (उज्बेकिस्तान), अब्दल्लाह उस्मान शेख (केन्या), डेबाशिस घोष (भारत), पिन हे (चीन), जर्ज ओयाखिरे (नाइजेरिया) र भिक्टर म्यानुएल रोचा (कोलम्बिया) छन् ।