अमेरिकी महान्यायाधिवक्ता बोंडीलाई ट्रम्पले किन हटाए ?
प्रकाशित मिति : १९ चैत्र २०८२, बिहिबार
अमेरिकी राष्ट्रपति डोनाल्ड ट्रम्पले पाम बोंडीलाई महान्यायाधिवक्ता (अटर्नी जनरल) पदबाट हटाएका छन्। ट्रम्पकी लामो समयदेखिकी सहयोगी तथा प्रशासनकी कट्टर समर्थक बोंडीलाई उनले अचानक पदमुक्त गरेका हुन्।
ट्रम्पले आफ्नै सामाजिक सञ्जाल ‘ट्रुथ सोसल’ मा पोस्ट गर्दै बोंडीको प्रशंसा गरेका छन् र उनी निजी क्षेत्रको नयाँ भूमिकामा जान लागेको उल्लेख गरेका छन्।
बोंडीको कार्यकाल विशेष गरी जेफ्री एपस्टिन सम्बन्धी फाइलहरू सार्वजनिक गर्ने विषय र सोसम्बन्धी अनुसन्धानका कारण विवादमा परेको थियो। पछिल्लो केही हप्तामा ट्रम्प प्रशासनबाट बाहिरिने उनी दोस्रो उच्च अधिकारी हुन्।
यसअघि गृह सुरक्षा मन्त्री क्रिस्टी नोएमलाई पनि पदबाट हटाइएको थियो। अब बोंडीको स्थानमा उनका पूर्व सहायक टोड ब्लान्च नियुक्त हुनेछन्।
यो घोषणा हुनुभन्दा केही घण्टा अघि मात्र ट्रम्पले बोंडीको कामको प्रशंसा गरेका थिए। तर, पछि अचानक उनको बिदाइको घोषणा गरियो। ट्रम्पले बोंडीले देशभर अपराध नियन्त्रणमा “उत्कृष्ट काम” गरेको बताएका छन्।
तर, विशेष गरी एपस्टिन सम्बन्धी फाइलहरू व्यवस्थापन गर्ने विषयमा ट्रम्प बोंडीसँग असन्तुष्ट हुँदै गएको बताइएको छ। बोंडीले पद सम्हाल्दा पारदर्शिता कायम गर्ने र एपस्टिनसँग सम्बन्धित कथित ‘ग्राहक सूची’ सार्वजनिक गर्ने वाचा गरेकी थिइन्। तर, पछि त्यस्तो कुनै सूची अस्तित्वमा नरहेको बताइएको थियो।
पछि दबाबका कारण लाखौँ फाइलहरू सार्वजनिक गरिए पनि पीडितहरूको पहिचान सुरक्षित राख्न नसकेको र अन्य प्रभावशाली व्यक्तिहरूको पहिचान लुकाइएको भन्दै दुवै दलका सांसदहरूले उनको आलोचना गरेका थिए।
कंग्रेसका केही सदस्यहरूले बोंडीको आलोचना गर्दै एपस्टिन फाइल पूर्ण रूपमा सार्वजनिक गर्नुपर्ने माग गरेका छन्। बोंडीमाथि पीडितहरूसँग प्रत्यक्ष संवाद नगरेको आरोप पनि लागेको छ।
यससँगै ट्रम्प प्रशासनमा उच्च तहका पदाधिकारीहरूको बिदाइको क्रम जारी रहेको देखिएको छ। यद्यपि, ट्रम्पको दोस्रो कार्यकाल पहिलो कार्यकालको तुलनामा केही स्थिर रहने अनुमान गरिएको छ।