बजेट विवाद र आलोचनापछि होमल्याण्ड सेक्युरिटी सेक्रेटरी क्रिस्टी नोएम बर्खास्त
प्रकाशित मिति : २१ फाल्गुन २०८२, बिहिबार
अमेरिकी राष्ट्रपति डोनाल्ड ट्रम्पले बिहीबार होमल्याण्ड सेक्युरिटी सेक्रेटरी क्रिस्टी नोएमलाई पदबाट बर्खास्त गरेका छन्। मन्त्रालयको नेतृत्व, अध्यागमन नियन्त्रणमा चालिएका कडा कदम र विपद् व्यवस्थापनमा देखिएका कमजोरीलाई लिएर चर्को आलोचना भएपछि राष्ट्रपति ट्रम्पले यो कदम चालेका हुन्। ट्रम्पले नोएमको स्थानमा ओक्लाहोमाका रिपब्लिकन सिनेटर मार्कवेन मुलिनलाई नयाँ गृहमन्त्रीका रूपमा मनोनयन गर्ने घोषणा सामाजिक सञ्जालमार्फत गरेका छन्।
नोएमको बहिर्गमनलाई ट्रम्प प्रशासनभित्रको एक ठूलो राजनीतिक उथलपुथलका रूपमा हेरिएको छ। उनी राष्ट्रपति ट्रम्पको ‘आम देशनिकाला’ नीतिको मुख्य योजनाकार थिइन्, तर पछिल्ला केही विवादास्पद घटनाक्रमले गर्दा उनी प्रशासनका लागि बोझ बन्दै गएकी थिइन्।
विशेष गरी मिनेयापोलिसमा दुई प्रदर्शनकारीको गोली हानी हत्या भएको घटना र विभागको अर्बौं डलर बजेट खर्च गर्ने अपारदर्शी शैलीका कारण उनीमाथि गम्भीर प्रश्न उठेको थियो। साथै, २२० मिलियन डलरको विवादास्पद विज्ञापन अभियानबारे ट्रम्पले आफू अनभिज्ञ रहेको बताएपछि नोएम थप नैतिक दबाबमा परेकी थिइन्।
होमल्याण्ड सेक्युरिटी सेक्रेटरीको पदबाट हटाए पनि ट्रम्पले नोएमलाई “स्पेशल एन्भोय फर द शिल्ड अफ द अमेरिकाज” नामक नयाँ सुरक्षा पहलको जिम्मेवारी दिएका छन्। ट्रम्पले सीमा सुरक्षामा नोएमले पुर्याएको योगदानको प्रशंसा गरेका छन्।
अर्कोतर्फ, विपक्षी डेमोक्रेटिक नेताहरू र मिनेयापोलिसका मेयरले भने उनको बहिर्गमनलाई “उचित निर्णय” भन्दै स्वागत गरेका छन्। नोएम आफैँले पनि सामाजिक सञ्जालमार्फत राष्ट्रपतिलाई धन्यवाद दिँदै आफ्नो कार्यकालमा अमेरिकालाई सुरक्षित बनाउन सफल भएको दाबी गरेकी छिन्।
अब नयाँ मनोनीत होमल्याण्ड सेक्युरिटी सेक्रेटरी मार्कवेन मुलिनले कार्यभार सम्हाल्न सिनेटबाट अनुमोदन हुन बाँकी छ। यद्यपि, संघीय कानुन अनुसार उनले तत्कालै कार्यवाहक गृहमन्त्रीका रूपमा काम सुरु गर्न सक्नेछन्।
मुलिनले आफू र राष्ट्रपति ट्रम्पबीच प्रगाढ मित्रता रहेको बताउँदै ह्वाइट हाउससँग मिलेर काम गर्न निकै उत्साहित रहेको प्रतिक्रिया दिएका छन्। उनले अब अमेरिकाको तेस्रो ठूलो मन्त्रालयको नेतृत्व गर्दै ट्रम्पको कडा अध्यागमन एजेन्डालाई प्रभावकारी रूपमा अगाडि बढाउनुपर्ने मुख्य चुनौती रहेको छ।