न्युयोर्क प्रहरीद्वारा गाडीबाट हिउँ र बरफ हटाउन चालकहरूलाई आग्रह, नत्र ८५० डलरसम्म जरिवाना
प्रकाशित मिति : माघ १८, २०८२ आईतबार
न्युयोर्क राज्यको कोर्टल्याण्ड काउन्टीस्थित इन्टरस्टेट–८१ मा भएको एउटा दुर्घटनापछि प्रहरीले चालकहरूलाई आफ्ना सवारी साधनमा जमेका हिउँ र बरफका ढिक्काहरू राम्ररी सफा गर्न आग्रह गरेको छ। उक्त घटनामा एउटा ट्याक्टर–ट्रेलरबाट खसेको ठूलो बरफको ढिक्काले गुडिरहेको पिकअप ट्रकलाई ठक्कर दिँदा ट्रकको अगाडिको सिसा (विन्डशिल्ड) र चालकतर्फको झ्यालमा क्षति पुगेको थियो।
प्रहरीले चालकहरूलाई केवल विन्डशिल्ड मात्र नभई सवारी साधनका सबै भागबाट हिउँ र बरफ पूर्ण रूपमा हटाउन सल्लाह दिएको छ। राजमार्गमा तीव्र गतिमा सवारी चलाउँदा सवारीको छत वा अन्य भागमा रहेको हिउँ उडेर अन्य चालकहरूका लागि अत्यन्तै खतरनाक हुन सक्ने भएकाले यस्तो सतर्कता अपनाउन आग्रह गरिएको हो।
हिमपातपछि घरअगाडिको फुटपाथ र सवारी साधन कति छिटो सफा गर्नुपर्ने र पैदल यात्रीका लागि बाटो कति चौडा हुनुपर्ने भन्ने विषयमा न्युयोर्क सिटीका छुट्टै नियमहरू छन्। ती नियमहरूको पालना नगरेमा जरिवाना हुन सक्छ। हिउँ पर्न बन्द हुने बित्तिकै समय गणना सुरु हुन्छ, र सवारी साधनबाट हिउँ नहटाएमा पनि जरिवाना लाग्न सक्छ।
सिटीका नियमअनुसार घर वा सम्पत्तिका मालिकहरू, भवनको जिम्मा लिएका व्यक्तिहरू, भाडामा लिनेहरू, सुपरिटेन्डेन्टहरू वा भवन म्यानेजरहरू घर तथा व्यवसायको छेउमा रहेको फुटपाथ सुरक्षित अवस्थामा राख्न जिम्मेवार हुन्छन्। नियमअनुसार घर, सम्पत्ति वा व्यवसायको अगाडिको फुटपाथ तथा आसपासका क्षेत्रबाट हिउँ, बरफ, फोहोर वा अन्य सामग्री हटाउनुपर्ने व्यवस्था छ।
यदि हिमपात बिहान ७ बजेदेखि दिउँसो ४ बजेर ४९ मिनेटको बीचमा रोकिएमा चार घण्टाभित्र फुटपाथ सफा गरिसक्नुपर्छ। हिउँ बेलुका ५ बजेदेखि ९ बजेर ५९ मिनेटको बीचमा रोकिएमा १४ घण्टाभित्र सफा गर्नुपर्छ। बेलुका ९ बजेपछि र बिहान ७ बजेअघि हिउँ पर्न रोकिएको खण्डमा भने बिहान ११ बजेसम्म सफा गरिसक्नुपर्ने व्यवस्था छ।
घर वा व्यवसायको छेउमा रहेको फुटपाथबाट हिउँ हटाउँदा फुटपाथबाट सडकतर्फ हिउँ धकेल्न पाइँदैन। घरअगाडि फायर हाइड्रन्ट भएमा त्यसको वरिपरि रहेको हिउँ हटाउनुपर्छ। क्रसवाकहरू हिउँले ढाकिनु हुँदैन। हटाइएको हिउँ आफ्नै अगाडिको यार्ड, स्टप लाइनको पछाडि वा घाँसे कर्ब स्ट्रिपमा सार्नुपर्छ।
सम्भव भएसम्म फुटपाथको छेउमा कम्तीमा चार फिट चौडा पैदल बाटो खुला राख्नुपर्छ। कुनामा पर्ने घरका मालिकहरूले पैदल यात्रीका र्याम्पसहित क्रसवाकतर्फ जाने बाटो पनि सफा गर्नुपर्छ। हिउँ पग्लिएर क्रसवाकमा जम्मा भएका पानीका कुण्डहरू हटाउनुपर्छ। ह्वीलचेयर र स्ट्रोलर प्रयोग गर्ने व्यक्तिहरूको आवश्यकतालाई विशेष ध्यान दिनुपर्ने नियममा उल्लेख छ।
समयमै फुटपाथ सफा नगरेमा सिटीले पहिलोपटक १०० देखि १५० डलरसम्म जरिवाना गर्छ। दोस्रोपटक १५० देखि ३५० डलरसम्म र तेस्रोपटक वा त्यसपछि २५० देखि ३५० डलरसम्म जरिवाना हुन सक्छ।
सन् २०१८ देखि सवारी साधनबाट हिउँ नहटाउने चालकहरूविरुद्ध पनि कानुनी कारबाहीको व्यवस्था गरिएको छ। सार्वजनिक सडकमा सवारी चलाउने कुनै पनि चालकले आफ्नो सवारी साधनको छत, कार्गो बेड र डिक्कीहरू सहित सबै सतहमा तीन इन्चभन्दा बढी हिउँ जमेको भए सफा गर्नैपर्छ।
सवारी साधनबाट हिउँ, बरफ वा असिना सफा नगरेमा १५० देखि ८५० डलरसम्म जरिवाना हुन सक्छ। पार्क गरिएका सवारी साधनहरू तथा आपतकालीन वा सार्वजनिक सुरक्षा प्रयोजनका सवारी साधनहरूलाई भने यस नियममा केही अपवाद दिइएको छ।