अब युएससीआईएसले अध्यागमन प्रयोजनका लागि पूराना तस्बिर प्रयोग नगर्ने
प्रकाशित मिति : मंसिर २६, २०८२ शुक्रबार
युएससीआईएसले अध्यागमन प्रयोजनका लागि पहिले सङ्कलन गरिएका तस्बिरहरूको पुनःप्रयोगलाई महत्त्वपूर्ण रूपमा सीमित गर्ने नयाँ नीति घोषणा गरेको छ। युएससीआईएसका अनुसार यो कदम राष्ट्रिय सुरक्षा बढाउन र जालसाजी रोक्नका लागि डिजाइन गरिएको हो। नयाँ निर्देशिका तत्काल लागू भएको छ भने डिसेम्बर १२, २०२५ मा वा त्यसपछि दर्ता गरिएका सबै अनुरोधहरूमा लागू हुन्छ।
अद्यावधिक गरिएको नीतिअनुसार युएससीआईएसले पहिले सङ्कलन गरिएको तस्बिरलाई बायोमेट्रिक सर्भिस अप्वाइन्टमेन्टमा सङ्कलन गरिएको मितिबाट ३६ महिनाभन्दा बढी समय बितिसकेको नभएमा मात्र पुनःप्रयोग गर्नेछ। यो पहिलेका नीतिहरूबाट एउटा महत्त्वपूर्ण परिवर्तन हो।
यदि कुनै आवेदकको फाइलमा रहेको तस्बिर नयाँ अध्यागमन फारम दर्ता गर्ने समयमा तीन वर्षभन्दा पुरानो भएमा युएससीआईएसले नयाँ तस्बिर सङ्कलन गर्नका लागि आवेदकलाई नयाँ बायोमेट्रिक अप्वाइन्टमेन्ट दिन सक्छ। एजेन्सीले तस्बिर जहुनसुकै भए पनि अवस्थित तस्बिरको पुनःप्रयोग गर्नुको सट्टा नयाँ तस्बिर आवश्यक पर्ने विवेक पनि प्रयोग गर्न सक्छ।
यो नीति महामारीको समयका लचकताहरू हटाउने प्रयासपछि आएको हो, जसले व्यक्तिगत अप्वाइन्टमेन्टको आवश्यकतालाई कम गर्न पुराना तस्बिरहरू पुनःप्रयोग गर्न अनुमति दिएको थियो। कोरोना महामारीको समयमा आवेदकको उमेरको आधारमा तस्बिरहरू पुनःप्रयोग गरिएको थियो—जसका कारण कहिलेकाहीँ कागजातको म्याद सकिने मितिसम्म २२ वर्षसम्म पुरानो तस्बिरसहितका सुरक्षित कागजातहरू जारी गरिएको युएससीआईएसले बताएको छ।
ती लचकताहरूको अन्त्यपछि युएससीआईएसले सेप्टेम्बर २०२४ मा एउटा अन्तरिम नीति स्थापना गरेको थियो। जसले २६ वर्ष र सोभन्दा माथिका व्यक्तिका लागि कुनै पनि सुरक्षित कागजातमा अधिकतम १० वर्षसम्म र २५ वर्ष र सोभन्दा कम उमेरका व्यक्तिका लागि ३० महिनासम्म तस्बिर पुनःप्रयोग गर्न सीमित गरेको थियो। नयाँ ३६ महिनाको मानकले तस्बिरको उमेर र सुरक्षित कागजातको वैधता समयरेखा दुवै गणना गर्नुपर्ने जटिल आवश्यकतालाई हटाएको छ।
आवेदकले स्वयं पेश गरेका तस्बिरहरू युएससीआईएसले प्रयोग वा पुनःप्रयोग नगर्ने प्रष्ट पारेको छ। बायोमेट्रिक अप्वाइन्टमेन्टमा खिचिएका वा अन्य आधिकारिक पेश गर्ने प्रक्रियामार्फत मात्र सङ्कलन गरिएका तस्बिरहरू पुनःप्रयोगका लागि विचार गरिनेछ। यसले सुरक्षित कागजातमा प्रयोग गरिएको तस्बिर हालसालैको, सही र भरपर्दो छ भन्ने सुनिश्चित गर्छ—युएससीआईएसको भनाइ छ।
केही प्रमुख फारमहरूमा आवेदकको अन्तिम तस्बिर जहुनसुकै समयमा खिचिएको भए पनि नयाँ बायोमेट्रिक्स लिइनेछ। यी फारमहरूमा अमेरिकी नागरिकता आवेदन र ग्रिनकार्ड आवेदनलगायत रहेका छन्।