डिसेम्बर १५ देखि अमेरिकाको कामदार भिसा आवेदकको पनि सामाजिक सञ्जाल निगरानी गरिने
प्रकाशित मिति : मंसिर १७, २०८२ बुधबार
अमेरिकी विदेश मन्त्रालयले भिसा प्रक्रियालाई थप कडा बनाउँदै आगामी डिसेम्बर १५ देखि लागू हुने गरी कामदार भिसा एच–वान–बीका आवेदकहरू तथा उनीहरूका आश्रित एच–फोर भिसा आवेदकहरूको अनलाइन उपस्थिति समीक्षाको दायरा विस्तार गर्ने घोषणा गरेको छ। यसअघि विद्यार्थी र एक्सचेन्ज भिजिटर भिसाका आवेदकहरूका लागि मात्र सीमित रहेको सामाजिक सञ्जालको विस्तृत चेकजाँच अब उच्च दक्षता भएका कामदार र उनीहरूको परिवारसम्म पनि लागू हुने भएको छ।
यो विस्तारित जाँच प्रक्रियालाई सहज बनाउन एच–वान–बी, एच–फोर, एफ, एम, र जे गैर–आप्रवासी भिसाका सबै आवेदकहरूलाई आफ्ना सबै सामाजिक सञ्जाल प्रोफाइलहरूको गोपनीयता सेटिङ सार्वजनिक गर्न स्पष्ट निर्देशन दिइएको छ। अर्थात्, यदि कसैले आफ्नो फेसबुक प्रोफाइल लक गरेको छ वा अन्य सामाजिक सञ्जालहरू ‘फ्लोअरहरू’लेमात्र हेर्न मिल्ने गरी बन्द गरेको छ भने, त्यस्ता आवेदकको भिसा अस्वीकृत हुने जोखिम रहन्छ।
विदेश मन्त्रालयले भिसाको विस्तृत जाँच र स्क्रीनिङका क्रममा उपलब्ध सबै जानकारीको प्रयोग गर्ने जनाइएको छ। यसको उद्देश्य अमेरिकामा प्रवेशका लागि अयोग्य ठहरिने आवेदकहरूलाई पहिचान गर्नु र विशेषगरी अमेरिकी राष्ट्रिय सुरक्षा वा सार्वजनिक सुरक्षाका लागि खतरा उत्पन्न गर्न सक्ने व्यक्तिहरूलाई रोक्नु रहेको मन्त्रालयले जनाएको छ। मन्त्रालयका अनुसार, हरेक भिसा निर्णयलाई राष्ट्रिय सुरक्षासँग सम्बन्धित निर्णयको रूपमा लिइने गरिएको छ।
विदेश मन्त्रालयले भनेको छ, “अमेरिकाले भिसा जारी गर्ने प्रक्रियामा सदैव सतर्क रहनुपर्छ, ताकि संयुक्त राज्य अमेरिकामा प्रवेशका लागि आवेदन दिनेहरूले अमेरिकीहरू वा राष्ट्रिय हितलाई हानि पुर्याउने उद्देश्य नराखून्। साथै, सबै आवेदकहरूले खोजिएको भिसाको लागि आफ्नो योग्यता विश्वसनीय रूपमा प्रमाणित गर्नुपर्छ, जसमा उनीहरूको प्रवेशका सर्तहरूसँग मेल खाने गतिविधिहरूमा संलग्न हुने इच्छा पनि समावेश हुनुपर्छ। मन्त्रालयले जोड दिएको छ—अमेरिकी भिसा एक अवसर हो, अधिकार होइन।”