गरिबलाई पूर्ण खाद्य सहयोग नगर्न ट्रम्प प्रशासनको अमेरिकी राज्यहरूलाई निर्देशन
प्रकाशित मिति : कार्तिक २३, २०८२ आईतबार
अमेरिकामा ट्रम्प प्रशासनले राज्यहरूलाई न्यून आय भएका परिवारहरूलाई पूर्ण खाद्य सहायता दिन रोक्न निर्देशन दिएको छ।
न्यून आय भएका अमेरिकी परिवारहरूलाई दिइँदै आएको पूर्ण खाद्य सहायता रोक्न अमेरिकी राज्यहरूलाई यो निर्देशन दिइएको हो। प्रशासनले यी भुक्तानीहरूलाई “अनधिकृत” भनेको छ।
अमेरिकी कृषि मन्त्रालय युएसडीएले जारी गरेको विवरण अनुसार राज्यहरूले अब पूर्ण सहायता रकमको केवल ६५ प्रतिशत मात्र वितरण गर्न सक्नेछन्।
सर्वोच्च अदालतले सरकारलाई केही रकम रोक्न अनुमति दिएपछि प्रशासनको पछिल्लो आदेश आएको अनुमान गरिएको छ।
हाल ४२ मिलियनभन्दा बढी अमेरिकी नागरिकहरू ‘फुड स्ट्याम्प’ (एसएनएपी कार्यक्रम) मा निर्भर छन्। तर, यो महिनादेखि उनीहरूले सरकारी बन्दका कारण आंशिक मात्र सहायता पाउन थालेका छन्।
गत हप्ताको सङ्घीय अदालतको आदेशपछि केही राज्यहरूले पूरा सहायता रकम वितरण गर्न थालेका थिए।
तर, शनिबार युएसडीएले नयाँ निर्देशन जारी गर्दै राज्यहरूले नोभेम्बर महिनाको १०० प्रतिशत सहायता वितरण तुरुन्तै रोक्नुपर्ने र ६५ प्रतिशतभन्दा बढी पठाइसकेको भए रकम फिर्ता लिन निर्देशन दिएको छ।
युएसडीएले चेतावनी दिएको छ कि यदि राज्यहरूले यस नयाँ निर्देशनको पालना गरेनन् भने सङ्घीय प्रशासनिक खर्चका लागि राज्यहरूलाई दिइने अनुदान रोक्न सकिनेछ। धेरै वितरण भएको रकमको जिम्मेवारी पनि राज्यहरूले नै लिनुपर्नेछ।
पूर्ण सहायता वितरण गर्न सुरु गरेका राज्यहरूमध्ये न्यूयोर्क, म्यासाचुसेट्स, क्यालिफोर्निया, विस्कन्सिन र पेन्सिल्भेनिया रहेका छन्।
यो कदम एसएनएपी को कोषसम्बन्धी लामो विवादको पछिल्लो चरण हो। सरकारले नोभेम्बर महिनादेखि एसएनएपी भुक्तानी रोक्ने चेतावनी दिएपछि कानूनी सङ्घर्ष सुरु भएको थियो।
गत शुक्रबार सर्वोच्च अदालतले आपत्कालीन आदेश जारी गर्दै प्रशासनलाई करिब ४ बिलियन डलर एसएनएपी कोष अस्थायी रूपमा रोक्न अनुमति दिएको थियो।
एसएनएपी कार्यक्रमअन्तर्गत अमेरिकामा प्रत्येक आठमध्ये एक व्यक्ति लाभान्वित छन्। यो कार्यक्रममा महिनामा करिब ९ बिलियन डलर खर्च हुन्छ। चार सदस्यीय परिवारले औसतमा महिनामा ७१५ डलर पाउँछ, जुन प्रतिदिन प्रत्येक व्यक्तिका लागि करिब ६ डलरभन्दा कम हो।