संसद्मा उपस्थितिका लागि सभामुखको चेतावनी
प्रकाशित मिति : भाद्र २७, २०७३ सोमबार
सभामुख ओनसरी घर्तीले बिनासूचना संसद् बैठकमा अनुपस्थित सांसदको स्थान रिक्तताको चेतावनी दिएकी छन् । संसद्मा आवश्यक गणपूरक सङ्ख्या नपुगेर महìवपूर्ण विधेयकसमेत पारित हुन नसक्ने अवस्था आएपछि सभामुखले सदनको उपस्थितिलाई अनिवार्य बनाउन रुलिङ गरेकी हुन् ।
व्यवस्थापिका संसद्को आइतबारको बैठकमा सभामुखले संविधानको धारा ८९(घ) को व्यवस्थामा सांसदलाई ध्यानाकर्षण गराउँदै बैठकमा सहभागी हुन सम्बन्धित सांसदको ध्यानाकर्षण गराएकी हुन् ।
संविधानको धारा ८९ (घ) अनुसार दस पटकभन्दा बढी लगातार बिनासूचना अनुपस्थित भएमा सदस्यको स्थान रिक्त हुने व्यवस्था छ । केही सांसद लामो समयदेखि बिनासूचना विदेशमा रहँदा र संसद्मा कोरम नपुगेकामा सभामुखको सक्रियता नभएको आलोचना भएपछि यस्तो रुलिङ गरेकी हुन् ।
गत शुक्रबारको बैठकमा पनि आवश्यक गणपूरक सङ्ख्या नपुगेर उच्च अदालत गठनसम्बन्धी विधेयक पारित हुन सकेको थिएन । सांसदहरू संसद्मा हाजिर गरेर गैरसरकारी संस्थाको कार्यक्रममा गएका थिए । यस्तै दल र सभामुखको समन्वयको अभावका कारण शुक्रबार संसद् बैठक चलिरहेकै अवस्था संसदीय समिति बैठक पनि राखिएको थियो ।
उच्च अदालत गठनको महत्वपूर्ण विधेयक कार्यसूचीमा भए पनि संसद्मा आवश्यक गणपूरक सङ्ख्या पुगेको थिएन । ५६५ सांसद रहेको संसद्मा शुक्रबार ३६६ को प्रारम्भिक उपस्थिति थियो । तर, गणपूरक सङ्ख्या एकिनका क्रममा १२६ सांसदमात्र उपस्थित थिए ।