चीनको तिब्बतमा आएको भूकम्पबाट ज्यान गुमाउनेको संख्या १२६ पुग्यो, झण्डै ४ हजार घर भत्किए
प्रकाशित मिति : पुस २३, २०८१ मंगलबार
चीनको दुर्गम तिब्बत क्षेत्रमा मङ्गलबार आएको विनाशकारी भूकम्पमा कम्तीमा १२६ जनाको मृत्यु भएको पुष्टि भएको छ । हजारौँ भवन क्षतिग्रस्त भएका छन ।
भूकम्प मङ्गलबार बिहान करिब ९ बजे नेपालसँगको सीमा नजिक सर्वोच्च शिखर सगरमाथाको करिब ८० किलोमिटर उत्तरमा रहेको ग्रामीण र उच्च उचाइको तिङरी काउन्टीमा गएको थियो ।
सिसिटिभीका अनुसार स्थानीय समयानुसार कम्तीमा १२६ जनाको मृत्यु पुष्टि भएको छ । १८८ जना घाइते भएका छन् । गम्भीर अवस्थामा रहेका २८ जनालाई उपचारका लागि अस्पताल लगिएको छ । ३ हजार ६ सय घर भत्किएका छन् ।
चाइना अर्थक्वेक नेटवक्र्स सेन्टर (सिइएनसी) ले भूकम्पको तीव्रता ६.८ मापन गरेको छ । तर युएस जियोलोजिकल सर्भेका अनुसार ७.१ म्याग्निच्युड मापन गरिएको छ ।
भूकम्पको केन्द्रविन्दु तिङरी लगभग ६२ हजार जनसङ्ख्याको घर हो । यो तिब्बतको राजधानी ल्हासा जस्तो सहरी केन्द्रहरू भन्दा कम विकसित छ ।
धेरै घर ढुङ्गा, माटोको इँटा र काठको बिम जस्ता परम्परागत सामग्रीहरू प्रयोग गरेर निर्माण गरिएको देखिन्छ ।
मङ्गलबारको भूकम्प पछिल्लो ५ वर्षमा २०० किलोमिटरको परिधिभित्र रेकर्ड गरिएको सबैभन्दा शक्तिशाली रहेको सिइएनसीले बताएको छ ।
सन् २०२३ को डिसेम्बरमा उत्तरपश्चिम चीनको गान्सु प्रान्तमा आएको भूकम्पमा १४८ जनाको मृत्यु भएको थियो । हजारौँ विस्थापित भएका थिए ।
यो सन् २०१४ पछि चीनको सबैभन्दा घातक भूकम्प थियो । सन् २०१४ मा आएको भूकम्पमा परी दक्षिण–पश्चिमी युनान प्रान्तमा ६ सयभन्दा बढी मानिसको मृत्यु भएको थियो ।