बाइडेनकालमा ८ हजारभन्दा बढी विनाभिसा आउने नेपाली सिमाक्षेत्रमा पक्राउ
प्रकाशित मिति : मंसिर २९, २०८१ शनिबार
अमेरिकी राष्ट्रपति जो बाइडेनको कार्यकालमा ८ हजारभन्दा धेरै नेपालीहरु विनाभिसा अमेरिका आउने सिमाक्षेत्रमा पक्राउ परेका छन् भने गत जुनमा लगाइएको एसाइलम प्रतिबन्धपछि मासिक संख्यामा बृद्धि देखिएको छ । डिपार्टमेन्ट अफ होमल्याण्ड सेक्युरिटीको पछिल्लो मासिक रिपोर्ट अनुशार अगस्तमा २६० जना नेपालीहरु विनाभिसा अमेरिका आउने क्रममा सिमाक्षेत्रमा पक्राउ परेका छन् भने यो संख्या जुलाईमा २१० र जुनमा २०० रहेको थियो । नेपालीको सेप्टेम्बरको रिपोर्ट अझै आइसकेको छैन ।
बाइडेनले सिमाक्षेत्रमा एसाइलममा गरेको कडाईपछिका ३ महिनामा कुल ६७० जना नेपालीहरु सिमाक्षेत्रमा पक्राउ परेका छन् । त्योभन्दा अगाडि मे महिनामा १८० जना नेपालीहरु मेक्सिकोको सिमाक्षेत्रबाट विनाभिसा अमेरिका प्रवेश गर्ने क्रममा पक्राउ परेका थिए । बाइडेन प्रशासनले जुनको पहिलोसातादेखि सिमाक्षेत्रमा एसाइलममा प्रतिबन्धहरु लागु गरेको थियो । आर्थिक बर्ष २०२४ को ११ महिनामा कुल ३३३० नेपालीहरु सिमाक्षेत्रमा पक्राउ परेका छन् । यो संख्या आर्थिक बर्ष २०२३ मा ३१४० रहेको थियो ।
आर्थिक बर्ष २०२३ को १२ महिना र २०२४ को ११ महिनाको यो तथ्यांक विगतका बर्षहरुको तुलनामा निकै उच्च रहेको छ । २०१४ देखि २०२२ सम्म ९ बर्षको अवधिमा जम्मा ५१८० जना नेपालीहरु मेक्सिकोको सिमाक्षेत्रबाट विनाभिसा अमेरिका प्रवेश गर्दा पक्राउ परेका थिए । तर त्यसको तुलनामा २०२२ को अक्टोबरदेखिको २२ महिनामा धेरै नेपालीहरु विनाभिसा अमेरिका प्रवेश गर्दा पक्राउ परेको तथ्यांक डिपार्टमेन्ट अफ होमल्याण्ड सेक्युरिटीले सार्वजनिक गरेको छ, जुन संख्या ६ हजार ४ सय ७० रहेको छ ।
आर्थिक बर्ष २०२२ मा यसरी अमेरिका प्रवेश गर्ने नेपालीहरुको संख्या १४९० थियो भने २०२१ मा ४२० जना नेपालीहरुमात्र विनाभिसा अमेरिका प्रवेश गरेका थिए । बाइडेन प्रशासनमा ८ हजार भन्दा नेपालीहरु विनाभिसा प्रवेश गर्ने क्रममा पक्राउ परेका छन् जबकी ट्रम्प प्रशासनको ४ बर्षमा १८५० जना नेपालीहरु विनाभिसा अमेरिका प्रवेश गर्ने क्रममा पक्राउ परेका थिए । अर्थात् आर्थिक बर्ष २०१७ मा ६५०, २०१८ मा ७२०, २०१९ मा ३४० र २०२० मा १४० जना नेपालीहरु मेक्सिकोबाट विनाभिसा अमेरिका प्रवेश गर्ने क्रममा पक्राउ परे ।
त्यस अगाडि २०१४ मा ४६०, २०१५ मा ४१०, २०१६ मा ५५० जना नेपालीहरु मेक्सिकोबाट विनाभिसा अमेरिका प्रवेश गर्ने क्रममा पक्राउ परेका थिए । उनीहरु दलाललाई हजारौं डलर तिरेर विनाभिसा अमेरिका प्रवेश गर्ने क्रममा सिमा सुरक्षा गस्तीको जम्काभेटमा परेका हुन् । तीमध्ये कतिपय तत्काल अमेरिकामा रिहा भएका थिए भने कतिपयलाई अध्यागमन हिराशतमा राखिएको थियो । त्यसमध्ये केही अमेरिकाबाट देशनिकालामा समेत परेका छन् ।