युएससीआईएसले पहिले अस्वीकृत भएका केही एसाइलम आवेदन पुनः खोल्ने
प्रकाशित मिति : मंसिर २०, २०८१ बिहीबार
संघीय अदालतले एउटा मुद्दामा एक सहमति सम्झौता स्वीकृत गरेपछि युएससीआईएसले पहिले अस्वीकृत भएका केही एसाइलम आवेदन पुनः खोल्ने भएको छ । मुद्दाले अभिभावकको साथमा नरहेका बालबालिका भनेर चिनिएका व्यक्तिहरूको एसाइलम आवेदनको व्यवस्थापनबारेको २०१९ को एउटा नीतिलाई चुनौती दिएको थियो । मेरिल्यान्ड डिस्ट्रिक्ट कोर्टले मुद्धाका पक्षहरूबीच पुगेको सहमति सम्झौतामा अन्तिम स्वीकृति दिएको छ।
२०१९ को जुलाईमा दायर गरिएको यो मुद्दाले डिपार्टमेन्ट अफ होमल्यान्ड सेक्युरिटी र युएससीआईएसले एसाइलम आवेदनलाई अवैध रूपमा अस्वीकृत गरेको आरोप लगाएको थियो । अध्यागमनअदालतमा देशनिकालाको प्रकृयामा रहेका र आवेदन दायर गर्दा अभिभावकको साथमा नरहेका बालबालिकाको परिभाषा अन्तर्गत नआउनेहरु उक्त नीतिबाट प्रभावित भएका थिए ।
मुद्दामा २०१९ को नीतिले एसाइलम खोज्नेहरूको अधिकारको उल्लङ्घन गरेको दावी गरिएको थियो । किनभने यसले एक वर्षको आवेदन समयसीमा लगाएको थियो जुन त्यसअघि अस्तित्वमा थिएन।
यो मुद्दाले तब विशेष चर्चा पायो जब अदालतले २०१९ को युएससीआईएसको नीति कार्यान्वयन रोक्न आदेश दियो। डिसेम्बर २०२० मा अदालतले यसलाई राष्ट्रव्यापी सामूहिक मुद्दाको रूपमा प्रमाणित गरेको थियो र युएससीआईएसबाट निर्णय पर्खिरहेकाहरूको अध्यागमन अदालत प्रक्रियामा ढिलाइको अनुरोधलाई अस्वीकृत नगर्न सरकारलाई निर्देशन दिएको थियो । लामो वार्तापछि पक्षहरू सहमति सम्झौतामा पुगेका हुन्, जसलाई अदालतले नोभेम्बर २५, २०२४ मा स्वीकृति दिएको हो ।
सहमति सम्झौता निश्चित मापदण्ड पूरा गर्ने व्यक्तिहरूलाई लागू हुनेछ । युएससीआईएसले एसाइलम आवेदनलाई यसको गुणस्तरको आधारमा निर्णय गर्नुपर्नेछ, चाहे आवेदक देशनिकालाको प्रक्रियामा नै किन नहोस्। साथै एक वर्षको समयसीमा पनि लागू हुनेछैन। अध्यागमन न्यायाधीशले युएससीआईएसको क्षेत्राधिकारलाई अस्वीकार गरे पनि युएससीआइएएसले आवेदनलाई प्रक्रियामा राख्नुपर्नेछ।
पहिले अस्वीकृत आवेदनहरूका लागि युएससीआईएसले अस्वीकारलाई उल्टाएर पुनः समीक्षाको लागि ल्याउनेछ। आपतकालीन अवस्थामा युएससीआईएसले ती आवेदनहरूको छिटो प्रक्रिया स्थापना गर्नेछ।
यो सहमतिले समेटिएकाहरुलाई अन्तिम देशनिकादाको आदेश भए पनि आइसले उनीहरूको आवेदन समीक्षामा रहँदा देशनिकाला गर्नेछैन । सम्झौता अनुशार युएससीआईएसले यी प्रक्रियाहरूको विवरण सहितको नीति मेमो जारी गर्नुपर्नेछ, जुन कम्तिमा तीन वर्षसम्म प्रभावकारी रहनेछ।
सहमति सम्झौता ५४८ दिनसम्म लागू हुनेछ र कुनै पनि उल्लङ्घन रिपोर्ट गर्न वर्ग वकिलसँग सम्पर्क गर्न सकिनेछ। यो सम्झौताले अभिभावकको साथमा नरहेका बालबालिकाका रूपमा चिनिएका एसाइलम खोज्नेलाई निष्पक्ष निर्णयको मौका दिन्छ र प्राविधिक कारणले अस्वीकृत हुनबाट जोगाउँछ।