फ्याक्ट चेक: टेक्सासमा मारिएकी मुनाका प्रेमी भनिएका व्यक्ति पक्राउ परेका बबीसिंह हुन्?
प्रकाशित मिति : भाद्र १४, २०८१ शुक्रबार
खसोखासले प्राप्त गरेको विवरणहरुका आधारमा फ्याक्ट चेक गर्दा टेक्सासमा गोली हानी मारिएकी मुना पाण्डेका प्रेमी भनिएका व्यक्ति पक्राउ परेका बबीसिंह शाह होइनन् । सामाजिक सञ्जाल प्रयोगकर्ताहरुले बबीसिंह शाह र मुना पाण्डेबीचको सम्बन्धका अनुमानहरु गरेपनि उनीहरुबीच कुनै सम्बन्ध अहिलेसम्म पुष्टी भएको छैन । बरु मुना पाण्डेका पूर्व प्रेमी भनिने व्यक्ति २५ बर्षभन्दा कम उमेरका देखिने एक श्वेत अमेरिकन युवा भएको खसोखासले प्राप्त गरेको विवरणमा देखिएको छ ।
मुना पाण्डेले आफ्ना पूर्व प्रेमी युवाका बारेमा आमालाई पनि पटकपटक जानकारी दिएकी थिइन् । ती युवासँगका कैयन भिडियो र फोटोहरु समेत मुनाले आमालाई पठाएकी थिइन् । ती युवासँग मुनाको जन्मदिनको सेरोफेरोमा गत जनवरीमा भेटघाट भएको र त्यसपछि उनीहरु प्रेम सम्बन्धमा रहेको मुनाले आमालाई जानकारी दिएकी थिइन् । खसोखासले पनि उनीहरुका केही भिडियो र फोटोहरु पारिवारिक श्रोतबाट प्राप्त गरेको छ । तर उनीहरुबीच पछिल्लो समयमा सम्बन्ध राम्रो नभएको पारिवारिक श्रोतबाट खुलेको छ ।
यद्यपी केही नेपाली सामाजिक सञ्जाल प्रयोगकर्ताले बबीसिंह र मुना पाण्डेबीच सुगर ड्याडी वेवसाइटमा भेटघाट भएको अनुमान गरेपनि त्यस्तो विवरण अहिलेसम्म पुष्टी भएको छैन । यो केबल अनुमानमात्र हो । उनीहरुबीच पहिले सम्बन्ध थियो वा थिएन भन्ने कुनै विवरण पुष्टी भएको छैन । प्रहरीले हत्या लुटपाटका क्रममा भएको बताएको छ ।
टेक्सासको एउटा अँग्रेजी सञ्चारमाध्यमले त मुना र बबीसिंहबीच सुगर ड्याडी वेवसाइटमा सन् २०१२ मा भेटघाट भएको समेत लेख्न भ्याएको छ । जबकी त्यो बेला मुना जम्मा ९ बर्षकी थिइन् । र नेपालमा नै थिइन् । वास्तवमा बबीसिंहलाई मुनाले होइन्, अकैं कुनै महिलाले सन् २०१२ मा सुगर ड्याडी वेवसाइटमा देखेकी थिइन् । तर केही संचारमाध्यमले त्यसलाई समेत तोडमोड गरेर समाचार प्रकाशन गरेका छन् । यसर्थ अहिलेसम्म बबीसिंह र मुनाबीच विगतमा कुनै सम्बन्ध भएको पुष्टी भएको छैन । भविश्यमा पुष्टी भयो भने त्यो अर्कै कुरा हो ।
बबीसिंह शाह नेपाली भएका केही सामाजिक सञ्जाल प्रयोगकर्ताहरुले दावी गरेका छन् । तर उनी नेपाली भएको पुष्टी कतैबाट पनि भएको छैन । कोही व्यक्ति कुनै कालखण्डमा नेपालमा बस्दैमा त्यसलाई नेपाली भन्न मिल्दैन । विगतमा सामाजिक सञ्जाल प्रयोगकर्ताहरुले नेपाली भाषी भुटानीकाबारेमा समाचारहरु सम्प्रेषण गर्दा पनि यस्तै गलत सुचनाहरु प्रवाह गर्दै आएका थिए । अदालती कागजातमा पनि बबीसिंहको जन्मस्थान खुलाइएको छैन । तर खसोखासले गरेको अनुसन्धानमा उनका आफन्तहरु भारतीय मूलका शिख समुदायका व्यक्तिहरु रहेको देखिएको छ ।
हो, मुना पाण्डेका हत्याका अभियुक्त बबीसिंह सुगर ड्याडी वेवसाइटमा सकृय रहेको विभिन्न व्यक्तिहरुले वयान दिएका छन् । यसर्थ बबीसिंहले विगतमा सुगर ड्याडी वेवसाइटहरु चलाएको हुनसक्ने प्रहरीको अनुमान छ । तर मुनाले उक्त वेवसाइट चलाएको वा बबीलाई उक्त वेवसाइटमा भेटेको कतैबाट पनि पुष्टी भएको छैन ।
एक्लै बस्ने पाण्डेको गत वर्षदेखि एकजना व्यक्ति पछि लागेको कुरा आमालाई समेत बताएकी थिइन् । तर ती व्यक्ति को थिए भन्नेबारे कुनै पुष्टी भएको छैन । व्यक्ति पछि लागेपछि मुनाले अगाडिको ढोका बाहिर क्यामेरा जडान गरेकी थिइन् ।
हत्या भएको रातिको भिडियो फुटेजमा पाण्डेले कालो पर्स सहित अन्य धेरै सामान बोकेको अवस्थामा बन्दुक बोकेको बबीसिंह देखिएको प्रहरीले जनाएको छ । बबीसिंहले पाण्डेलाई आफ्नो अपार्टमेन्टको ढोका खोल्न बारम्बार भनेका थिए। पाण्डेले के गर्छौ भनेर सोधेकी थिइन् । त्यो बेला बबीसिंहले मुनालाई कोठाभित्र धेकेलेको र ढोका बन्द गरेको ८ बजेर ४१ मिनेटको भिडियो फुटेजमा देखिएको छ । त्यसपछि ९ बजेर ४८ मिनेटको भिडियो फुटेजमा बबीसिह त्यहाँबाट बाहिरिएको देखिएको छ ।
यसैबीच मुना पाण्डेलाई गोली हानी हत्या आरोपमा पक्राउ गरिएको व्यक्ति बबी सिंहलाई धरौटीमा रिहा गर्न अदालतले अस्वीकार गरेको छ । जघन्य अपराधको लागि जमानत अस्वीकार गर्न सुनुवाइको लागि राज्यको प्रस्तावलाई विचार गरेपछि र प्रस्तुत गरिएको प्रमाणहरूमा स्पष्ट र बलियो प्रमाणबाट अपराध भएको, अभियुक्त दोषी भएको र कानूनको प्रबन्ध भएमा मृत्युदण्डको सजाय हुनसक्ने भएकाले धरौटीमा रिहा गर्न अस्वीकार गरिएको अदालतको आदेशमा उल्लेख छ ।
ह्यारिस काउन्ठी डिस्ट्रिक्ट एटोर्नी अफिसका सहायक डिस्ट्रिक्ट एटोर्नी जिम लिटनरले हस्ताक्षर गरेर अदालतमा पेश गरेको कागजातमा प्रुफ इभिडेन्ट सुनुवाइको लागि जमानत अस्वीकार गर्नको लागि फाइल गरेको देखिएको छ । प्रतिवादीलाई जघन्य अपराधको अभियोग लगाइएको र राज्य स्पष्ट र बलियो प्रमाणका साथ सुनुवाईको लागि अघि बढ्ने तर प्रतिवादी अभियोग अघि जमानतको हकदार नभएको भन्दै जमानत अस्वीकार गर्न अदालतसमक्ष अनुरोध गरिएको थियो ।
बबी सिंह शाहविरुद्ध जघन्य हत्याको अभियोग लगाइएको छ । जघन्य हत्याको अभियोग टेक्सासमा हत्याको सबैभन्दा गम्भीर रूप हो, जसमा मृत्युदण्डसम्म हुनसक्ने कानुनी व्यवस्था छ । बबी सिंह शाहले लुटपाटका क्रममा घातक हतियारको प्रयोग गरी आयशयुक्त तरिकाले मुना पाण्डेको गोली हानी हत्या गरेको अदालती कागजातमा उल्लेख गरिएको छ ।
अभियुक्त ५१ वर्षीय शाहविरुद्ध २६२ औं स्टेट डिस्ट्रिक्ट कोर्टमा जघन्य हत्याको अभियोग दायर गरिएको हो । सेप्टेम्बर ३ मंगलबार बबी सिंहलाई अदालतमा पेश गरिने भएको छ । त्यस्तै बबी सिंहविरुद्ध गैर कानुनी रुपमा हतियार बोकेको अर्को अभियोग पनि लगाइएको छ । गैरकानुनी रुपमा गाडीमा हतियार बोकेको र हतियार कभरले नछोपी देखिने गरी राखेको उक्त अभियोगमा बबी सिंहलाई सेप्टेम्बर ५ बिहिबार अदालतमा पेश गरिने भएको छ ।
शाहलाई बुधबार बेलुका ८ बजे लगत्तै उत्तरपश्चिम ह्युस्टन ट्राफिक स्टपमा पक्राउ गरिएको हो । ह्युष्टन प्रहरीको विशेष हतियार र रणनीति टिमका अधिकारीहरू, ह्युष्टन प्रहरीको अपराध न्यूनीकरण इकाई र टेक्सास डिपार्टमेन्ट अफ पब्लिक सेफ्टीको समन्वयकारी प्रयासबाट शाहलाई पक्राउ गरिएको थियो । शाहलाई ह्यारिस काउन्टी जेलमा राखिएको छ ।
प्रहरीले बुधबार दिउसो संदिग्धको फोटो सार्वजनिक गरेको गरेको केही घण्टापछि पक्राउ गरेको हो । सीटीटिभी फुटेजबाट लिइएको फोटो अगस्त २४ शनिबार राती ९ बजेर ४८ मिनेटको थियो ।
मुना पाण्डे सोमबार साँझ गोली लागेको अवस्थामा अपार्टमेन्टमा भेटिएपछि प्रहरीलाई खबर गरिएको थियो । सोमबार बेलुका ५ बजेर ३५ मिनेटमा प्रहरी घटनास्थलमा पुग्दा उनलाई मृत अवस्थामा भेटाएको ह्युष्टन प्रहरीले बताएको थियो । अदालती कागजातमा मुनालाई घुच्चुकमा एक गोली हानिएको उल्लेख छ । मुनालाई छाती लगायत अन्य भागमा थप २ गोली हानिएको जनाइएको छ ।
घटनाबारे जानकारी पाएपछि प्रहरीको टोली वेष्ट एयरपोर्ट ब्लुभार्डमा रहेको घटनास्थलमा पुगेको र त्यहाँ पुग्दा २१ बर्षकी महिला मृत अवस्थामा भेटिएको प्रहरीले जानकारी दिएको छ । घटनाबारे अनुसन्धान जारी रहेको प्रहरीले जनाएको छ ।
ह्युस्टन प्रहरीले जारी गरेको विज्ञप्तीमा गस्ती अधिकारीहरूले पीडितलाई अपार्टमेन्ट भित्र धेरैवटा बन्दुकको गोली लागेको भेट्टाएको बताइएको थियो । प्यारामेडिकले उनलाई घटनास्थलमै मृत घोषणा गरेको थियो । अपार्टमेन्ट कम्प्लेक्सका कर्मचारीहरूले ९११ मा कल गर्नु अघि उनीहरूलाई अपार्टमेन्ट भित्रको शवको बारेमा अज्ञात कल प्राप्त भएको प्रहरीलाई बताएका थिए ।