रोजगारमा आधारित पहिलो श्रेणी ‘एक्स्ट्राअर्डिनरी ग्रिनकार्ड’को कोटा पूरा, थप भिसा जारी नहुने
प्रकाशित मिति : भाद्र १३, २०८१ बिहीबार
कोटा पूरा भइसकेको भन्दै अमेरिकाले चालु आर्थिक बर्षमा रोजगारमा आधारित पहिलो श्रेणीको एक्स्ट्राअर्डिनरी ग्रिनकार्ड र सम्बन्धित आप्रवासी भिसा जारी नगर्ने भएको छ । अमेरिकाको आप्रवासन र राष्ट्रियता ऐनले रोजगारीमा आधारित भिसाहरूको बार्षिक संख्यामा कोटा तोकेको छ । उक्त कोटा आर्थिक बर्ष समाप्त हुनु अगाडि नै पूरा भएको हो ।
रोजगारमा आधारित पहिलो श्रेणीका लागि रोजगारमा आधारित कुल भिसाको २८ दशमलव ६ प्रतिशतमात्र प्रयोग गर्न पाउने प्रावधान रहेको छ । उक्त प्रावधान अनुशार सबै भिसा संख्या प्रयोग भइसकेको अमेरिकी विदेश मन्त्रालय ब्यूरो अफ कन्सुलर अफेयर्सले जनाएको छ । त्यसलै आगामी सेप्टेम्बरमा यो श्रेणीमा कसैले पनि ग्रिनकार्ड वा आप्रवासी भिसा पाउनेछैनन् ।
युएससीआईसँग नजिकबाट सहकार्य गरिरहेको विदेशमन्त्रालयले आर्थिक वर्ष २०२४ को लागि रोजगारमा आधारित पहिलो श्रेणीका कोटिमा लागि कानूनी रूपमा उपलब्ध सबै भिसाहरू जारी गरेको जनाएको छ । अमेरिकी दूतावास र कन्सुलेटहरुले आर्थिक वर्षको बाँकी अवधिमा रोजगारमा आधारित पहिलो श्रेणीमा भिसा जारी नसक्ने अमेरिकी विदेश मन्त्रालयले प्रष्ट पारेको छ । फलस्वरूप रोजगारमा आधारित पहिलो श्रेणी पनि तुरुन्तै अनुपलब्ध भएको छ भने सेप्टेम्बर ३० सम्म यो श्रेणीमा भिसा जारी गरिनेछैन ।
अक्टोबर १ मा आर्थिक बर्ष २०२५ सुरु भएपछि भने वार्षिक सीमा रिसेट हुनेछ। त्यसपछि अमेरिकी दूतावास र कन्सुलेटहरुले योग्य आवेदकहरूलाई यी कोटीहरूमा आप्रवासी भिसा जारी गर्न पुन सुरु गर्न सक्नेछन् । अक्टोबरका लागि कुन प्राथमिकता मिति भएकाले भिसा पाउन सक्नेछन् भन्ने विवरण आगामी महिनाको भिसा बुलेटिनमा सार्वजनिक गरिनेछ ।
आप्रवासी भिसा वा ग्रिनकार्ड जारी नभएपनि प्राथमिकता मिति करेन्ट भएका श्रेणीका सन्दर्भमा युएससीआईएसले सेप्टेम्बरका लागि पनि आई ४८५ आवेदन स्वीकार भने गर्नुपर्छ । यद्यपि ती आवेदनहरु अक्टोबर १ भन्दा अगाडिसम्म विचाराधिन अवस्थामा नै राखिनेछन्।
त्यस्तै ग्रिनकार्डका लागि युएसीआईएसमा अन्तरवार्ताको मिति तय भइसकेका आवेदकहरुले पनि सोही मितिमा नै अन्तर्वार्तामा उपस्थित हुने योजना बनाउनुपर्छ । तर अन्तर्वार्ता भए पनि भिसा नम्बर उपलब्ध नभएसम्म आवेदन भने विचाराधिन अवस्थामा नै राखिनेछ भने भिसा नम्बर उपलब्ध हुनासाथ निर्णय गरिनेछ ।
यस अगाडि रोजगारमा आधारित तेश्रो श्रेणीको भिसा र ग्रिनकार्डको पनि कोटा पूरा भएको भन्दै उक्त श्रेणीमा ग्रिनकार्ड र थप भिसा जारी गर्न बन्द गरिसकिएको छ । रोजगारमा आधारित तेश्रो श्रेणीका लागि पनि रोजगारमा आधारित कुल भिसाको २८ दशमलव ६ प्रतिशतमात्र प्रयोग गर्न पाउने प्रावधान रहेको छ ।