रोजगारमा आधारित तेश्रो श्रेणीका ग्रिनकार्डको कोटा पूरा,यो आर्थिक बर्षमा थप भिसा जारी नगर्ने
प्रकाशित मिति : श्रावण ३२, २०८१ शुक्रबार
कोटा पूरा भइसकेको भन्दै अमेरिकाले चालु आर्थिक बर्षमा रोजगारमा आधारित तेश्रो श्रेणीका थप भिसा जारी नगर्ने भएको छ । युएससीआईसँग नजिकबाट सहकार्य गरिरहेको विदेशमन्त्रालयले आर्थिक वर्ष २०२४ को लागि रोजगारमा आधारित तेस्रो श्रेणीका योग्य र योग्यता नभएका कामदारको कोटिहरूका लागि कानूनी रूपमा उपलब्ध सबै भिसाहरू जारी गरेको जनाएको छ ।
अमेरिकाको आप्रवासन र राष्ट्रियता ऐनले रोजगारीमा आधारित भिसाहरूको बार्षिक संख्यामा कोटा तोकेको छ । रोजगारमा आधारित तेश्रो श्रेणीका लागि रोजगारमा आधारित कुल भिसाको २८ दशमलव ६ प्रतिशतमात्र प्रयोग गर्न पाउने प्रावधान रहेको छ ।
उक्त कोटा अनुशार चालु आर्थिक बर्ष २०२४ का लागि रोजगारमा आधारित तेश्रो श्रेणीका लागि उपलब्ध सबै भिसाहरू प्रयोग भइसकेकाले अमेरिकी दूतावास र कन्सुलेटहरुले आर्थिक वर्षको बाँकी अवधिमा रोजगारमा आधारित तेश्रो श्रेणीमा भिसा जारी गर्न नसक्ने अमेरिकी विदेश मन्त्रालयले प्रष्ट पारेको छ । फलस्वरूप रोजगारमा आधारित तेश्रो श्रेणी तुरुन्तै अनुपलब्ध भएको छ भने सेप्टेम्बर ३० मा यो श्रेणीमा भिसा जारी गरिनेछैन ।
अक्टोबर १ मा आर्थिक बर्ष २०२५ सुरु भएपछि भने वार्षिक सीमा रिसेट हुनेछ। त्यसपछि अमेरिकी दूतावास र कन्सुलेटहरुले योग्य आवेदकहरूलाई यी कोटीहरूमा आप्रवासी भिसा जारी गर्न पुन सुरु गर्न सक्नेछन् । अक्टोबरका लागि कुन प्राथमिकता मिति भएकाले भिसा पाउन सक्नेछन् भन्ने विवरण आगामी महिनाको भिसा बुलेटिनमा सार्वजनिक गरिनेछ ।
आप्रवासी भिसा वा ग्रिनकार्ड जारी नभएपनि प्राथमिकता मिति करेन्ट भएका श्रेणीका सन्दर्भमा युएससीआईएसले अगस्ट र सेप्टेम्बरका लागि पनि आई ४८५ आवेदन स्वीकार भने गर्नुपर्छ । यद्यपि ती आवेदनहरु अक्टोबर १ भन्दा अगाडिसम्म विचाराधिन अवस्थामा नै राखिनेछन्।
त्यस्तै ग्रिनकार्डका लागि युएसीआईएसमा अन्तरवार्ताको मिति तय भइसकेका आवेदकहरुले पनि सोही मितिमा नै अन्तर्वार्तामा उपस्थित हुने योजना बनाउनुपर्छ । तर अन्तर्वार्ता भए पनि भिसा नम्बर उपलब्ध नभएसम्म आवेदन भने विचाराधिन अवस्थामा नै राखिनेछ भने भिसा नम्बर उपलब्ध हुनासाथ निर्णय गरिनेछ ।