नेपाली पासपोर्टवाहकलाई ३८ देश जाँदा पहिले नै भिसा लिनु पर्दैन, यी हुनसक्छन् आकर्षक गन्तव्य
प्रकाशित मिति : पुस २८, २०७९ बिहीबार
नेपाली पासपोर्टवाहकलाई पनि विश्वका विभिन्न ३८ देशको यात्रा गर्दा पहिले नै भिसा लिनु पर्दैन । हेन्ले पासपोर्ट इन्डेक्स अनुशार ती देशमा यात्रा गर्दा या त भिसा लाग्दैन, या त अन अराइभल भिसा प्रदान गरिन्छ । तीमध्ये केही देशमा यात्रा गर्दा भने विद्युतीय यात्रा अनुमति ईटीए लिनुपर्छ ।
ओसियानिया कुक आइल्याण्ड, माइक्रोनेसिया, निउ यात्रा गर्न नेपाली पासपोर्टवाहकलाई भिसा चाहिदैन । पलाउ आइल्याण्ड, सामोआ र टुभालुमा नेपाली पासपोर्ट वाहकलाई अन अराइभल भिसा प्रदान गरिन्छ ।
क्यारेबियनमा डोमिनिका, हैटी र सेन्ट भिन्सेन्ट एण्ड ग्रेनेडाइन्समा नेपाली पासपोर्टवाहकलाई भिसा आवश्यक पर्दैन । दक्षिण अमेरिकामा बोलिभियामा नेपालीलाई अन अराइभल भिसा प्रदान गरिन्छ ।
एसियाका बंगलादेश, कम्बोडिया, लाओस, माल्दिभ्स, टिमोर लेस्टेमा नेपाली पासपोर्टवाहकलाई भिसा अन अराइभलको व्यस्था रहेको छ । भारत, इन्डोनेसिया, पाकिस्तान, फिलिपिन्स र सिङ्गापुरमा नेपाली पासपोर्टवाहकलाई प्रवेश गर्न भिसा आवश्यक पर्दैन । त्यस्तै श्रीलंकामा विद्युतीय यात्रा अनुमति ईटीए लिनुपर्छ ।
अफ्रिकामा भने धेरै देशमा नेपालीहरुलाई विना भिसा वा भिसा अन अराइभलको सुविधा रहेको छ । बुरुन्डी, केप भर्डे आइल्याण्ड, कोमोरो आइल्याण्ड, इजिप्ट,
गिनी बिसाउ, मेडागास्कर, मौरिटानिया, मौरिसस, मोजाम्बिक, रुवाण्डा, सेशेल्स, सोमालिया, तान्जानिया, टोगो र युगान्डामा अन अराइभल भिसाको व्यवस्था छ । त्यस्तै सेनेगल र गाम्बिया जानका लागि नेपाली पासपोर्ट वाहकले भिसा लिन आवश्यक पर्दैन ।
भिसा लिनु नपर्ने, अन अराइभल भिसा प्रदान गरिने वा विद्युतीय यात्रा अनुमति ईटीए लिनुपर्ने भएतापनि फरक फरक देशका फरक फरक अध्यागमन नियमहरु रहेका छन् । कतिदिनसम्म बस्न पाइने भन्नेबारे पनि फरक फरक नियमहरु रहेका छन् । त्यसैले त्यस्ता नियमहरुको भने पालना गर्नुपर्छ ।
एसियामा नेपालीहरुको आकर्षक गन्तव्य सिंगापुर रहदै आएको छ । सिंगापुर जान नेपालीलाई भिसा चाहिँदैन । तपाईलाई चाहिने मात्र कागजात कम्तिमा ३० दिनसम्म बस्न मिल्नेगरी वैधता भएको राहदानी हो। सामान्यतया ६ महिनाभन्दा बढीको म्याद भएको पासपोर्टमा यात्रा गर्न सकिन्छ ।