विद्यालयमा गोली चलाउने त्रास फैलाउने अमेरिकाभर दर्जन बढी टीनएजर पक्राउ, कक्षाहरु समेत रद्द
प्रकाशित मिति : पुस ४, २०७८ आईतबार
अमेरिकाभरका विद्यालयहरुमा गोली चल्ने त्रास फैलाउने सामाजिक सञ्जालको ट्रेण्डमा सहभागी भएको अभियोगमा अमेरिकाका विभिन्न राज्यहरुमा एकदर्जनभन्दा बढी टीनएजरहरुलाई पक्राउ गरिएको छ । गोली चलाउने अफवाहपछि विद्यालयहरुले सुरक्षा शतर्कता बढाइरहेको अवस्थामा उनीहरुलाई पक्राउ गरिएको हो ।
बिहिबार र शुक्रबारमात्र कनेक्टिकट, क्यालिफोर्निया, फ्लोरिडा, इलिनोय, मेरिल्याण्ड, ओहायो, रोढ आइल्याण्ड, साउथ क्यारोलिना, टेक्सास र विसकन्सिमबाट दर्जनबढीलाई पक्राउ गरिएको छ । मिसिगनको नोभेम्बर ३० को गोलीकाण्डपछि अमेरिकाभरका विद्यालयहरुमा गोली चल्ने अफवाह डढेलोजस्तै फैलिएको थियो ।
पक्राउ पर्ने टीनएजरहरु १३ देखि १६ बर्षभित्रका रहेका छन् । स्थानीय विद्यालयमा हिंशाको धम्की दिएको अभियोगमा फ्लोरिडाको ली काउन्टीमा १३ बर्षीयसहित तीनजना टीनएजरलाई प्रहरीले पक्राउ गरेको छ । १३ बर्षीयले फोर्ट मेयर प्राइभेट स्कुलमा अश्वेतहरुमाथि गोली चलाउने संकेत गर्दै स्न्यापच्याट पठाएको प्रहरीले जनाएको छ ।
धम्कीहरु वास्तविक र नक्कली जे भएपनि बालबालिकाहरुको सुरक्षा आफ्नो उच्च प्राथमिकता रहेको लि काउन्टीका प्रहरी अधिकारी कार्मिन मार्सिनोले बताएका छन् । धम्कीदिने व्यक्ति जो सुकै भएपनि पत्ता लगाइने र जेल पठाइने उनले बताएका छन् ।
टेक्सासको फ्रिस्कोमा सामाजिक सञ्जालमा धम्की पठाउने माध्यमिक विद्यालयका सातजना विद्यार्थीहरुलाई प्रहरीले शुक्रबार पक्राउ गरेको थियो । यस्ता धम्कीहरु हास्यास्पद र सुन्दर नभएको सन्देश सहपाठीहरुलाई दिनुपर्ने फ्रिस्को प्रहरीले समुदायलाई सन्देश दिएको छ ।
डिपार्टमेन्ट अफ होमल्याण्ड सेक्युरिटीले कुनै विश्वसनीय खतरा नभएपनि विद्यालयका अधिकारीहरुलाई शर्तक रहन सुझाव दिएको छ । विद्यालयहरुमा आक्रमणको त्रास फैलिएपछि कैयन विद्यालयहरुले दिउसोका कक्षाहरु रद्द गरेका छन् भने कतिपयले विद्यार्थीहरुलाई विद्यालयभित्र कहाँकहाँ जान मिल्ने भन्ने सिमा तोकेका छन् ।
टेक्सासको ह्युस्टन क्षेत्रका झण्डै एकदर्जन विद्यालयहरुले शुक्रबार माध्यामिक र उच्च माध्यामिक स्तरका विद्यार्थीहरुलाई आफ्ना झोलाहरु घरमै छाड्न भनेका थिए । टिकटकमा फैलिएको अफवाहपछि यस्तो कदम चालिएपनि विश्वसनीय धम्कीभने कुनै पनि विद्यालयले प्राप्त नगरेको जनाइएको छ ।