बर्लिनको रसियन दूतावास अगाडि मृत भेटिएका व्यक्ति रसियन जासुस भएको दावी
प्रकाशित मिति : कार्तिक १९, २०७८ शुक्रबार
बर्लिनमा रहेको रसियन दूतावास अगाडि मृत भेटिएका व्यक्ति रसियन खुफिया एजेन्सीसँग सम्बन्धित जासुस रहेको जर्मन अधिकारीहरुले दावी गरेका छन् । गत अक्टोबर १९ मा बर्लिनमा रहेको दूतावास अगाडिको सडकपेटीमा ती रसियन कुटनीतिज्ञको शव भेटिएको थियो ।
३५ बर्षका ती कुटनीतिज्ञको शव विहानै सडकपेटीमा भेटिएको थियो । उनी रसियन दूतावास भवनको माथिल्लो तलाबाट खसेको जनाइएको थियो । उनी भवनबाट किन लडे वा मृत्युको कारण के थियो भन्नेबारे अझै स्पष्ट छैन । मृतक कुटनीतिज्ञ बर्लिनमा रहेको रसियन दूतावासमा सन् २०१९ देखि द्वितीय सचिवका रुपमा रहेका थिए ।
तर जर्मन सुरक्षा अधिकारीहरुले ती व्यक्ति जर्मनको खुफिया एजेन्सी एफएसबीमा कार्यरत जासुस रहेको दावी गरेका छन् । उनी रसियाको एफएसबीका उच्च अधिकारी भएको र द्वितीय सचिवको कभरमा जर्मनीमा रहदै आएको विश्वास गरिएको छ ।
रसियन दूतावासले ती अधिकारीको अटोप्सीका लागि जर्मनीका अधिकारीहरुलाई स्वीकृति दिएको छैन । कुटनीतिक इम्युनिटीका कारण जर्मनीका सार्वजनिक अभियोजनकर्ताहरुले उनका बारेमा अनुसन्धान गर्न नसक्ने रसियन दूतावासको भनाई छ । रसियन र जर्मन अधिकारीहरुले त्यहाँको पत्रिकाले एक खोज रिपोर्ट प्रकाशित गरेपछि रसियन कूटनीतिज्ञको निधन भएको स्वीकार गरेका छन् ।
रसियन दूतावासले वक्तब्य जारी गरेर आफ्ना कुटनीतिज्ञको मृत्यु भएको बताएको छ । साथै उनको शव स्वदेश पठाउन प्रकृया अगाडि बढाइएको समेत बताएको छ । पश्चिमा संचारमाध्यमले घटनाबारे आएका समाचारहरु गलत भएको भन्दै दूतावासले खण्डन समेत गरेको छ ।
जर्मनको विदेश मन्त्रालयका प्रवक्ताले आफूहरु रसियन कुटनीतिज्ञको मृत्युबारे जानकार रहेको तर सम्बन्धित व्यक्ति र आफन्तको व्यक्तिगत मामलाका कारण थप जानकारीहरु सार्वजनिक गर्न नसक्ने बताएका छन् । रसियन विपक्षी नेता एलेक्स नवलनीलाई सन् २०२० को अगस्तमा विष दिनु अगाडि तीनबर्षसम्म रसियन खुफिया एजेन्सी एफएसबीको टिमले ६ देखि १० जनासम्म पिछा गरेको रिपोर्ट आएको एकबर्षपछि यी कुटनीतिज्ञको मृत्यु भएको हो ।