अलविदा कोलिन पावेल: अन्तिम संस्कारमा २ पूर्व राष्ट्रपति ओबामा र बुसका साथमा बाइडेन उपस्थीत
प्रकाशित मिति : कार्तिक १९, २०७८ शुक्रबार
President Joe Biden, first lady Jill Biden, former President Barack Obama, former first lady Michelle Obama and former President George W. Bush stand during a funeral service for former Secretary of State Colin Powell at the Washington National Cathedral, Friday, Nov. 5, 2021, in Washington. (AP Photo/Evan Vucci)
अमेरिकी पूर्व विदेशमन्त्री कोलिन पावेलको अन्तिम संस्कारमा २ पूर्व राष्ट्रपतिहरु बराक ओबामा र जर्ज डब्ल्यु बुसका अमेरिकी राष्ट्रपति जो बाइडेन उपस्थीत भएर श्रद्धाञ्जली व्यक्त गरेका छन् । शुक्रबार आयोजित अन्तिम संस्कारमा वर्तमान विदेशमन्त्री एन्टोनी ब्लींकेन र पूर्व अमेरिकी विदेशमन्त्रीहरु हिलारी क्लिन्टन र कोन्डोलिजा राइसको पनि उपस्थीति रहेको थियो ।
पावेलको अक्टोबर १८ मा कोरोना संक्रमणको जटिलताबाट ८४ बर्षको उमेरमा निधन भएको थियो । पावेलले कोरोनाबिरुद्धको भ्याक्सिनको पूर्ण डोज लगाएका थिए भने उनको वाल्टर रिड नेशनल मेडिकल सेन्टरमा उपचार गरिएको थियो । पावेल सन् २००१ देखि सन् २००५ सम्म राष्ट्रपति जर्ज डब्ल्यु बुसको पहिलो कार्यकालमा विदेशमन्त्री भएका थिए । पावेल अमेरिकाका ६५ औं विदेशमन्त्री थिए ।
कोलिन पावेल अमेरिकाका पहिलो अश्वेत विदेशमन्त्री थिए । उनी सन् १९८९ मा संयुक्त चिफ अफ स्टाफका १२ औं अध्यक्ष समेत भएका थिए ।
सन् १९८७ देखि सन् १९८९ सम्म पावेल अमेरिकाका राष्ट्रिय सुरक्षा सल्लाहकार थिए भने त्योभन्दा अगाडि सहायक राष्ट्रिय सुरक्षा सल्लाहकार थिए । सन् १९३७ मा न्युयोर्क सिटीमा जन्मिएका उनको ८४ बर्षको उमेरमा निधन भएको हो ।
रिपब्लिकन प्रशासन अन्तगत महत्वपूर्ण भूमिकाहरुमा रहेर काम गरेका पावेलले गत जनवरीमा क्यापिटल हिलमा भएको दंगापछि आफूलाई रिपब्लिकन नमान्ने घोषणा गरेका थिए ।
नेपालको भ्रमण गर्ने सबैभन्दा उच्च अमेरिकी अधिकारी
पावेल नेपालको भ्रमण गर्ने सबैभन्दा उच्च अमेरिकी अधिकारी थिए । सन् २००१ को जनवरी २० देखि सन् २००५ को जनवरी २६ सम्म अमेरिकाको ६५ औं विदेशमन्त्री भएका पावेलले सन् २००२ मा नेपालको भ्रमण गरेका थिए ।
उनी नेपालको भ्रमण गर्ने एकमात्र अमेरिकी विदेशमन्त्री हुन् । उनले नेपालको भ्रमण गर्दा शेरबहादुर देउवा प्रधानमन्त्री रहेका थिए । उनलाई नेपालका तत्कालिन परराष्ट्रमन्त्री डाक्टर रामशरण महतले त्रिभुवन अन्तर्राष्ट्रिय विमानस्थलमा स्वागत गरेका थिए ।
कोलिन पावेलले सन् २००२ को जनवरी १८ मा नेपालका तत्कालिन प्रधानमन्त्री शेरबहादुर देउवा र अन्य उच्च अधिकारीहरुलाई भेटेका थिए ।
कोलिन पावेल नेपाल भ्रमणमा आएको झण्डै १७ बर्षसम्म नेपाल र अमेरिकाबीच उच्चस्तरीय औपचारिक भेटघाट भएको थिएन । सन् २०१८ को डिसेम्बरमा अमेरिकी विदेशमन्त्री माइक पम्पिओ र नेपालका परराष्ट्रमन्त्री प्रदीप कुमार ज्ञवालीबीच भएको भेटवार्ता त्यसपछिको उच्चस्तरीय औपचारिक भेटघाट थियो । तर उक्त भेटघाट अमेरिकामा भएको थियो ।
सन् २००२ मा तत्कालिन अमेरिकी विदेशमन्त्री कोलिन पावेल नेपाल भ्रमणमा आएयता दुईदेशका अधिकारीबीचको औपचारिक भ्रमण भएको थिएन । यद्यपी युद्धमा रहेको माओवादीविरुद्ध अप्रेसनमा सैन्य सहयोग माग्दै देउवा अमेरिका पुगेर राष्ट्रपति जर्ज डब्लु बुससँग भेटवार्ता गरेका थिए । तर, अमेरिकी दस्तावेजमा देउवाको भ्रमणलाई निजी भनिएको थियो ।
सन् २०१८ को डिसेम्बरमा नेपाल र अमेरिकाबीच परराष्ट्रमन्त्रीस्तरीय वार्तालाई भने औपचारिक वार्ता भनिएको थियो ।
नेपाल र अमेरिकाबीचको सम्बन्ध झण्डै ७३ बर्ष पुरानो सम्बन्ध हो । यो सम्बन्धको दौरान कोलिन पावेलको नेपाल भ्रमणलाई निकै महत्वपूर्ण मानिन्छ । अमेरिकाले नेपाललाई सन् १९४७ मा स्वतन्त्र राष्ट्रको मान्यता प्रदान गरेको थियो । सन् १९४७ को अप्रिल २५ मा नेपाल र अमेरिकाबीच कूटनीतिक सम्बन्ध स्थापित भएको हो ।
सन् १९९५ मा प्रथम महिलाका रुपमा हिलारी क्लीन्टनले नेपालको भ्रमण गरेकी थिइन् । कार्टर सेन्टरका संस्थापकका रुपमा अमेरिकाका पूर्व राष्ट्रपति जिम्मी कार्टरले सन् २००७ र सन् २००८ मा नेपालको भ्रमण गरेका थिए ।