धेरै प्रतिशतलाई कोरोनाबिरुद्धको खोप लगाउनेमा दक्षिण एशियामा नेपाल चौथो
प्रकाशित मिति : आश्विन ४, २०७८ सोमबार
नेपालमा कोरोनाबिरुद्धको खोप लगाइदै
धेरै प्रतिशतलाई कोरोनाबिरुद्धको खोप लगाउनेमा दक्षिण एशियामा नेपाल चौथो स्थानमा परेको छ । दक्षिण एशियाका मुलुकहरुमा नेपालमा कुल जनसङ्ख्यामध्ये १९ दशमलव ४४ प्रतिशतले कोरोनाबिरुद्धको खोपको पूर्ण मात्रा लगाइसकेका छन् ।
नेपालमा हालसम्म ६२ लाख जनाले कम्तीमा एकडोज र ५५ लाखभन्दा बढीले पूर्ण मात्रा खोप पाइसकेको स्वास्थ्य मन्त्रालयको तथ्याङ्क छ। कोभिशिल्ड, आष्ट्राजेनेका र भेरोसेल खोप दुई डोज लगाउनुपर्ने भएपनि जोन्सन एण्ड जोन्सनको एकडोजमात्र लगाए पुग्ने भएकोमा नेपालमा अहिलेसम्म झण्डै सबा करोड डोज खोप वितरण भइसकेको छ ।
भारतमा कुल जनसङ्ख्याको १४ दशमलव ५५ प्रतिशतले पूर्ण मात्रा कोभिड खोप लगाइसकेका छन् । त्यस्तै पाकिस्तानमा कुलमध्ये ११ दशमलव ०७ प्रतिशत जनसङ्ख्याले पूर्ण मात्रा खोप लगाइसकेको छ। श्रीलङ्कामा कुल जनसङ्ख्याको ५० दशमलव ३१ प्रतिशतले पूर्ण मात्रामा कोभिड खोप लगाएको तथ्याङ्क छ।
बाङ्ग्लादेशमा ८ दशमलव ८७ प्रतिशत जनसङ्ख्याले पूर्ण मात्राको खोप लगाइसकको तथ्याङ्क छ। दक्षिण एशियामा अफगानिस्तानमा सबैभन्दा कम १ दशमलव १३ प्रतिशतले मात्र पूर्ण मात्राको खोप लगाएको तथ्याङ्क छ।
माल्दिभ्समा कुल जनसङ्ख्याको ६२ दशमलव १६ प्रतिशतले पूर्ण मात्राको कोभिड खोप लगाएका छन्। दक्षिण एशियाली मुलुकमध्ये भुटानमा कुल जनसङ्ख्याको सबैभन्दा धेरै अर्थात् ६२ दशमलव ७६ प्रतिशतले पूर्ण मात्राको कोभिड खोप लगाइसकेका छन्।